Instat: Сурия билан ўйиннинг энг яхшилари - ИброҳимҲалил ва Ҳожимат
13 ноя 2020 21:25
Янгиликлар

Instat: Сурия билан ўйиннинг энг яхшилари - ИброҳимҲалил ва Ҳожимат

Кеча Ўзбекистон терма жамоаси Сурия билан ўртоқлик учрашуви ўтказди.

Футбол ўйинларини таҳлил қилувчи "Инстат" компанияси маълумотлари асосида терма жамоамиз футболчиларининг Сурия билан ўйиндаги кўрсаткичларини тақдим этамиз.

Унга кўра чап қанот ҳимоячиси ИброҳимҲалил Йўлдошев 236 балл тўплаб терма жамоамиз сафида энг яхши футболчи бўлди. Ҳимоячи ўйин давомида 66та пас берди ва унинг 82 фоизи аниқ бўлди. Бир марта унинг тўп узатиши рақиб дарвозаси олдида хавфли вазият содир бўлишини таъминлади. 16 марта курашга киришган Йўлдошев 63 фоиз курашда ғолиб бўлди.

Иккинчи ўринда захирадан майдонга тушган Ҳожимат Эркинов қайд этилди - 227 балл. Икки марта дарвозага зарба берган (терма жамоамиз сафидаги энг яхши кўрсаткич) Эркинов 12 бор шерикларига тўп узатди ва унинг 83 фоизи аниқ бўлди. Бир бор тўп узатиш хавфли вазиятни содир этди. Ҳожимат 13 марта курашга киришди ва унинг 38 фоизида ғолиб бўлди.

Кучли учликни яна бир захирадан майдонга тушган футболчи якунлаб берди. Мурод Холмуҳаммедов "Инстат" бўйича 225 балл тўплади. У 29та пас берди ва уларнинг 76 фоизи аниқ чиқди. Учрашув давомида унинг иккита тўп узатиши рақиб дарвозаси олдида хавфли вазиятни вужудга келтирди (терма жамоамиздаги энг яхши кўрсаткич). 3 бор курашга киришди ва 67 фоизида ютиб чиқди.

Ўйин давомида ўнг қанот ҳимоячисига айланган Азизжон Ғаниев терма жамоамиз сафида энг кўп пас берган футболчи бўлди - 86та. Ундан кейинги ўринларни Йўлдошев (66та), Лутфулла Тўраев (58та) ва Исломжон Қобилов (56та) эгаллашди.

Тўп узатишларнинг аниқлиги борасида Аброрбек Исмоилов пешқадам бўлди. Захирадан майдонга тушган ярим ҳимоячи 19та пас берди ва уларнинг 95 фоизи аниқ чиқди. Дарвозабонимиз Абдувоҳид Неъматов 27 бор шерикларига тўп узатди ва унинг 89 фоизи манзилга аниқ борди. Исломжон Қобилов (56та тўп узатиш) ва Санжар Қодирқулов (8та тўп узатиш) 88 фоиз аниқликка эришишди.

Ўйин давомида терма жамоамиз рақиб дарвозаси томон бир марта аниқ зарба беришди. Ўша вазиятда тўпни Бобир Абдихолиқов тепганди. Эркинов (2та), Ғаниев, Бозоров, Қодирқулов, Машарипов ва Абдихолиқовнинг яна биттадан зарбаси дарвозага аниқ бормади.

Баҳсда терма жамоамиз сафида Қобилов ва Машарипов ҳавода рақиб билан курашди - 7 мартадан. Исломжон 29 фоиз ҳолатда ғолиб бўлди, Жалолиддин эса 14 фоиз ҳолатда рақибдан ҳаводаги курашда устун келди. Мурод Холмуҳаммедов икки бор ҳавода курашга киришди ва иккаласида ғолиб бўлди. Ғаниев эса бир бор ҳаводаги курашга кирди ва унда ғолиб бўлди.

Учрашув давомида Ўзбекистон терма жамоаси таркибида энг кўп дриблингни Ойбек Бозоров амалга оширди - 6та. Уларнинг ярми муваффақиятли чиқди. Йўлдошев беш марта дриблинг қилди (80 фоиз муваффақиятли), Эркинов ҳам бешта дриблинг ишлатди (40 фоиз муваффақиятли).

Дарвозабон Абдувоҳид Неъматов қўриқлаган дарвоза томон сурияликлар 9та зарба беришди, шундан 4таси дарвозага аниқ борди. Неъматов 3 марта сейв намойиш этди. Яъни аниқ зарбаларнинг 75 фоизини қайтарди. Бир бор Неъматов суперсейв намойиш этди. Баҳс давомида Абдувоҳид рақибнинг қанотдан узатган 9та тўпини ушлаб олди.

	Index	Дақиқа	Зарба	Пас	Пас %	Муҳим пас	Кураш	Ютилган кураш %
ИброҳимҲалил Йўлдошев	236	97	-	66	82	1	16	63
Ҳожимат Эркинов	227	36	2	12	83	1	13	38
Мурод Холмуҳаммедов	225	27	-	29	76	2	3	67
Исломжон Қобилов	220	97	-	56	88	-	17	41
Аброрбек Исмоилов	218	27	-	19	95	1	2	100
Игорь Голбан	212	70	-	36	86	-	18	56
Азизжон Ғаниев	211	97	1	86	80	-	13	62
Абдувоҳид Неъматов	210	97	-	27	89	-	-	-
Ойбек Бозоров	208	61	1	15	87	-	12	25
Достонбек Ҳамдамов	202	36	-	15	87	-	5	80
Лутфулла Тўраев	195	83	-	58	81	-	14	21
Санжар Қодирқулов	194	14	1	8	88	-	1	100
Жалолиддин Машарипов	182	61	1	34	76	1	12	25
Бобир Абдихолиқов	182	77	1	13	77	-	15	33
Ҳожиакбар Алижонов	180	10	-	12	75	-	-	-
Темурхўжа Абдухолиқов	172	20	-	6	67	-	5	60
Жамшид Искандеров	171	70	-	44	75	1	11	18