Илёс Зейтуллаев: "Барчамиз "Бунёдкор"ни аввалги даражасига қайтариш йўлида ишлаяпмиз"

Ўйин ҳақида

- Барчага хайрли кеч. Зўр атмосфера учун футболчиларга ва мухлисларга рахмат. Бугунги учрашувда жамоамиз аъзолари масъулиятни ҳис қилган ҳолда ҳаракат қилишди. Натижа учун жавобгар эканимизни барчамиз яхши тушуниб тургандик. Осон ўйин бўлди дея олмайман, ҳар икки жамоа ҳам охиригача курашди. "Шўртан" жамоасига навбатдаги баҳсларда муваффақият тилайман.

- "Бунёдкор" таркибидаги легионер жалб этилиши ҳақида айтиб берсангиз ...

- Бизда селекция ишлари доимий давом этади. Мавсум олдидан бир қатор легионер футболчилар жамоамизда кўрикдан ўтишди. Бизга сифатли футбол намойиш этадиган легионерлар зарур эди. Качорри дубл қайд этганидан хурсандман. Легионер ёки маҳаллий футболчи бўлиши аҳамиятсиз, муҳими жамоамизга нафи тегиши керак.

- "Шўртан" сиз кутганчалик қаршилик кўрсата олдими?

- Жамоани яхши ўрганиб чиққандик. Бу жамоа таркибида битта вазиятдан унумли фойдаланиб кета оладиган ижрочилар бор. Эҳтиёткорлик ҳар доим футболнинг ажралмас қисми. Мавсум эндигина бошланди, ҳозирча хулосалар учун эрта.

- "Бунёдкор"нинг ёрқин даврларини яхши эслаймиз. Жамоа қачон яна ўша даражасига қайтиши мумкин?

- Зўр савол. "Бунёдкор"да ёрқин тарих бор. Биз барчамиз ҳозир жамоани аввалги даврларига қайтариш йўлида ишлаяпмиз. Ўтган мавсумларда клуб анчайин инқирозларни бошдан ўтказди. Ёшлар бизнинг келажагимиз, биз ўйиндан-ўйинга ўсиб боришимиз керак. 

- Бугунги ўйин даражасидан қониқдингизми?

- Албатта, натижадан келиб чиқса, қониқиш мумкин. Сафарда ғалаба қайд этилиши ёқимли ҳолат. Лекин мавсумнинг боши бўлгани сабаб кичик хатолар ҳам кўзга ташланиб турибди.

- Италия футболи ҳимоявий футболга асосланади. Мураббийлар штабингизда италиялик мутахассислар бор. Лекин "Бунёдкор" кўпроқ ҳужумкор футбол ўйнамоқда. Сиз рақибга қараб ўйин қурасизми ёки жорий мавсум ҳужумкор футболни мақсад қилганмисиз?

- Ҳозир ҳамма футбол ўйнашни билади. Жисмоний имкониятлардан келиб чиқиб ҳаракат қилишимиз керак. Ҳар бир ўйин рақибдан келиб чиққан ҳолда қурилади. Ҳужумкорлик бизнинг асосий мақсадларимиздан бири, шу орқали ғалабаларга эришишимиз мумкин.