Игорь Сергеев БАА клубига ўтишга яқин
12 дек 2017 19:40
Янгиликлар

Игорь Сергеев БАА клубига ўтишга яқин

Теглар : Ал Дафра Пахтакор Игорь Сергеев

"Пахтакор" клуби ва Ўзбекистон терма жамоаси ҳужумчиси Игорь Сергеев фаолиятини хорижда давом эттириши мумкин.

Бу ҳақда championat.asia БАА футбол нашрларига таяниб хабар тарқатди.

БАА про-лигасида иштирок этувчи "Ал Дафра" клуби ўзбекистонлик ҳужумчи билан келишувга эришишга яқин. Сергеев 2015 йилда олий лига тўпурари бўлганди. Бу мавсум ҳужумчи олий лигада 13та гол урди.

"Ал Дафра" айни пайтда БАА про-лигасида 11та ўйиндан сўнг 8 очко билан 12та жамоа орасида 11-ўринда бормоқда. Жамоани суриялик Муҳаммад Квид бошқариб бормоқда. Клуб сафида айни пайтда бразилиялик Аилтон, марокашлик Иссам Эл Адоуа ва Одил Хермач, ироқлик Муҳаннад Абдул Раҳим каби легионерлар ўйнашмоқда.

Маълумот учун, Сергеев 2016 йилда Хитойнинг "Бейжинг Гоан" клубида ижарада ўйнаб қайтганди.