Игорь Сергеев: "Асосий таркибга лойиқ эканлигимни исботлашим керак эди"

Учрашув тугагач микст зонада ҳужумчининг фикрлари билан қизиқдик.

- Биринчи булимда бошқа, иккинчи бўлимда умуман бошқа футбол гувоҳига айландик...
- Биз дастлабки бўлимда рақибни ўргандик десак ҳам бўлади. Тўғри бу жамоани ўргангандик лекин майдонда бутунлай бошқача бўлади. Бундан ташқари кучли ёмғир ёғиб турди. Иккинчи бўлимда эса биз жисмонан кучли эканлигимиз кўриниб турди. Ғалаба учун интилдик ва ёмғир ҳам бизга халал бера олмади.

- Гол урилган вақтда ёмғир сизга ёрдам бердими?
- Йўқ, йўқ. Аксинча бундай ёмғирда тўп сирпаниб кетади. Шу боис бор эътиборимни тўпга қаратдим ва бошим билан имкони борича аниқ зарба беришга уриндим.

- Бу энди ёшлар ўртасидаги мусобақа эмас, Осиё Кубоги. Илк учрашувда майдонга тушишингизни кутганмидингиз?
- Тўғрисини айтсам кутмагандим. Сабаби бизда рақобат жуда кучли. Лекин машғулотларда астойдил ишладим. Мураббий менга ишониб асосий таркибга киритди, унга лойиқ эканлигимни кўрсатишим керак эди.

Нодирхўжа Юлдашев
Сидней шаҳридан