Ҳусниддин Ғофуров жамоаси чемпионатни муваффақиятли бошлади

Яқинда ушбу давлатда ҳам премьер лига  ўйинлари бошланди. Иваницанинг “Явор” клуби чемпионат тақвимига кўра дастлабки ўйинни ўз майдонида ўтказди.

“Црвена Звезда”ни қабул қилган Богича Богичевич жамоаси мавсумни муваффақиятли бошлади. Боиси  Ҳусниддин Ғофуров тўп сураётган жамоа шу куни рақибини 4:2 ҳисобида мағлубиятга учратиб, мухлисларини қувонтирди. Мазкур баҳсда “Явор” мураббийлар штаби асосий эътиборни тажрибали ўйинчиларга қаратди ва кўпроқ етакчиларнинг хизматидан фойдаланди.

Шу боис легионерлар лимити юзага келганлиги сабабли Ғофуров “Црвена Звезда” билан ўйинда таркибга киритилмади.  
17 август шанба куни эса премьер лиганинг 2-тур ўйинлари бўлиб ўтди.

“Явор” бу гал энди сафарда “Донжи Срем” жамоаси билан куч синашди. Шу куни Иваница жамоаси меҳмонда ўйнашига қарамай, якунда ўзи учун ижобий бўлган натижа билан қайтишга эришди дейиш мумкин, “Донжи Срем” – “Явор” 1:1. Шу тариқа икки ўйинда 4 очко қўлга киритган “Явор” ҳозирда чемпионат пешқадами бўлиб турибди.

Сафарда кечган ўйинда бош мураббий иқтидорли ҳужумчимиз Ғофуровни ўйин қайдномасига киритди. Аммо ҳамюртимиз шу куни захирада қолдирилди.
- Мураббийлар кейинги учрашувларда ўйнаш учун имконият беришларини айтди – дейди Ҳусниддин Ғофуров. Майдонга тушишга ва жамоамга фойда келтиришга доим тайёрман.

Умид қиламанки, кейинги баҳсларда янги жамоам таркибида расмий дебютимни ўтказаман. Асосий мақсадим ҳар бир ўйинда “Явор” учун фойдали голлар уриб, жамоамнинг муҳим ўйинчиларидан бирига айланиш.