Ҳамиджон Актамов: "Мен мураббийга эмас Мессига мухлислик қиламан"

"Ўзига ҳос дерби ва қизиқарли ўйин гувоҳи бўлдик. Учрашувни назорат қилдик, вазиятлар яратдик. Лекин доимгидек гол уришга қийналяпмиз. Икки жамоага ҳам очко керак эди. Сафарда бир очко бўлса ҳам ишладик.

Танаффуслар футболчиларнинг ўйинини издан чиқариб юбормоқда. Пандемиядан сўнг формага кириб олганимизда ФИФА кунлари бошланиб қолмоқда. ФИФА куни 14 кун бўлса 20 кунга чўзилиб кетмоқда. Ўйинлар вақтида ҳар тўрт ёки беш кунда ўтса чемпионатни тугатиб олган бўлардик. Мана ҳозир декабрь ойида ҳам ўйнаймиз. Ҳаво совуқ. Январь ойидан яна йиғинга киришишимиз керак. Молиявий жиҳатдан ҳеч қандай муаммо йўқ. Сўнгги пайтларда жароҳатлар ҳам панд бермоқда. Асосий таркиб футболчимиз ҳали ўзига келгани йўқ.

Кубок декабрда ўтгани билан чемпионат билан бирга уни ҳам якунлашимиз керак. Буни ташкил қилаётганлар ўйлаши керак эди. Ҳозирда қийин. Биргина бизга эмас ҳаммага қийин. Ҳеч кимда кўзда тутилмаган режа йўқ. Бугун режа қилсангиз бир ҳафтадан сўнг режангиз ўзгариб кетади. Бу йил футболда ҳеч қандай ўзгаришни кўрмадим. Тўхталишлар кўп бўляпти. Декабрда бўлса ҳам ўйнаймиз, ишимизни охиригача етказиб қўйишимиз керак.

Мавсум бошида кучли бешликка киришни мақсад қилгандик. Режаларимиз бошқача эди. Орада жамоадан кетдим, яна қайтдим. Иккинчи даврада таркибни кучайтирдик. Футболчиларга эътирозим йўқ. Барча жамоалар бир хил шароитда. Қай тартибда тайёргарлик кўрсангиз ҳам узилиш, тўхталиш бўляпти, ўйин издан чиқяпти. Бугун тўп назорати биз томонда бўлди, 70/30. Охирги паллада гол урадиган футболчи топилмади. Мен мураббийга эмас футболчиларга мухлислик қиламан. Кимга? Мессига",- дейди Ҳамиджон Актамов.