Ҳамиджон Актамов: "75 дақиқа давомида хато қилмай якунда барибир ютқаздик"

"Ўйин қизиқарли ўтди. Кўрдинглар, ҳимояга ётиб олмадик, ҳужумлар уюштирдик. Иккита оддий хатолардан кейин голлар ўтказдик. 75 дақиқа давомида хато қилмай якунда барибир ютқаздик, "Пахтакор" барибир хато қилишга мажбур қилди. Бугун биз ҳам мағлуб бўлишни хоҳламагандик", - дейди Актамов. 

- Нестеров бугун ҳам, олдинги ўйинларда ҳам яхши ўйнади. Уни кейинги мавсумда ҳам "Қизилқум"да кўрамизми?
- Ҳали олдинда Суперлиганинг бир қанча турлари, кейин Кубок баҳслари бор. Тўғри Нестеров жамоамизга ёрдам бермоқда, унинг олдида 10 нафар футболчи ҳам бор. Ҳозирча кейинги мавсум ҳақида ўйлаганимиз йўқ.

- Иброҳим Томива "Қизилқум"га келганида голлар урганди, сўнгги баҳсларда эса ўйинида пасайиш бўлди. Биринчи даврада Маккартни Невасеб ҳам шундай бўлганди...
- Тўғри бугун Иброҳимда қулай имкониятлар бўлди. Оёғидан олган жароҳати ҳали тўла тузалмаган. Ҳужумдаги муаммолар туфайли уни майдонга туширяпмиз.

- Захирада Воҳид Шодиев ҳам бор...
- Шодиевда ҳам соғлиғида муаммолар бор. Шу боис майдонга тушмаяпти.

- Тачмурад Агамуродов жамоадан кетганми?
- Йўқ. Агамуродов маслаҳатчи мураббий сифатида ишламоқда. Бирга ишлаймиз. Тўғри захира ўриндиғида эмас, тепада ўтирди.

- Касминин нима учун бугун ўйнамади?
- Унинг ҳам соғлиғида муаммо бор. Агар у майдонга тушганида бизга ёрдам берган бўларди. Бугун соғ юрган одам эртага вирусни юқтириб олаяпти. Бу вирус Ўзбекистондан, бутун дунёдан йўқ бўлишини худодан сўрайман. Фақат футбол эмас, барча соҳаларга таъсир қилмоқда.