Гризманн билан можаро ва Буффоннинг қайтиши: июлнинг 10та шов-шувли трансферлари

Сўнгги тўрт ярим ҳафта ичида нафақат кутилган, балки кутилмаган трансферлар ҳам амалга ошди. Энди ўтган ойнинг энг қизиқарли трансферларини таҳлил қиламиз ва клублар қанча сарфлашганини қўриб чиқамиз. 

Стефан Эль-Шаарави ("Рома" - "Шанхай Шенхуа")

Эль Шааравининг "Шанхай Шенхуа"га ўтиши кутилмаган ёзги трансферларидан бирига айланди. 28 июнь куни италиялик Хитойга кетмаслигини айтиб ўтганди. "Ҳозирда Европани тарк этиш ниятим ёқ. Ҳали ҳам юқори савияда ўйнашни хоҳлайман. Эндигина 26 ёшдаман ва ўйлайманки, бундай кескин қарор қабул қилишга ҳали эрта". Аммо орадан бироз вақт ўтгач, футболчи рад этолмайдиган таклиф олди. 8 июль куни у юқори савияда ўйнаш истагидан воз кечиб, Хитой клуби ўйинчисига айланди. Стефан янги жамоаси билан уч йиллик шартнома остига имзо чекди ва йилига 10 млн. евро миқдорида маош олади. Шунингдек, у 10 млн. евро миқдорида кўтарма пули олади.

Киран Триппьер ("Тоттенхем" - "Атлетико Мадрид")

Триппьернинг Лондон клубидан кетиши ёқотиш бўлди. Олдинига, Киран "Инстаграм"даги мухлислари билан хайрлашди, "шпорлар" теги ўрнига адашиб НБА жамоаси "Сан-Антонио Спёрс" қисқартмасини қўйди, кейин интервьюда ўзининг собиқ клубидаги ёмон вазият ҳақида гапирди. "Тоттенхем"да ички зиддиятлар вужудга келган кўринади. Тафсилотларни ошкор қилмайман, шунинг учун ҳам кетишга қарор қилдим" - дейди Триппьер. Нима бўлганда ҳам инглизлар трансфердан икки томонлама манфаат кўришди. "Атлетико" ҳар қандай талабга жавоб бера оладиган тезкор қанот ҳимоячисига эга бўлди ва бу Киранга ўсиши учун яхши имконият. Футболчи янги клуби билан тузган шартномаси 3 йилга мўлжалланган.

Набиль Фекир ("Лион" - "Бетис")

Набил Фекирнинг трансфери, қачонки футболчи чўққига чиққанда, ўз вақтида жамоасини ўзгартирмаса, у қандай ҳолга тушиб қолишини исботлади. Ўтган ёзда Фекирга кўплаб топ-клублар қатори "Ливерпуль" ҳам қизиқиш билдирганди. Мерсисайдликлар франциялик футболчини 70 млн. еврога сотиб олишни режалаштиришганди, аммо у тиббий кўрикдан ўта олмади. Жорий 2019 йилнинг ёзида Набилни "Бетис" 19,75 млн еврога сотиб олди ва томонлар 4 йиллик шартномани имзолашди. Эҳтимол, ҳужумчининг нарҳи унинг статистикаси туфайли тушиб кетган. Якунланган мавсумда у 39 ўйин ўтказиб, атиги 12 та гол урди ва 9 та голли пас берди.

Тангай Н'Домбеле ("Лион" - "Тоттенхем")

"Шпорлар" жорий ёзда 18 ойлик танаффусдан сўнг трансферлар бозорида фаолликни бошлаб юборишди.  Клуб 18 ёшли "Лидс" вингери Жек Кларкни сотиб олгандан сўнг "Лион"нинг 22 ёшли ярим ҳимоячиси Н'Домбеле билан келишувга эришди. Шартнома 2025 йилгача тузилган ва трансфер суммаси 60 млн. еврони ташкил қилди. Тангай ҳисобига лондонликлар ярим ҳимоя маркази анча кучайди. Н'Домбеле аниқ пас бериш қобилиятига эга бўлиши билан биргаликда унда юқори дриблинг салоҳияти бор. Шунингдек якка курашларда ҳам чакки эмас. Якунланган мавсумда футболчи Лига 1 доирасида ўтказилган ўйинларда 1 гол ва 7 ассистни амалга оширган.

Диего Годин (эркин агент - "Интер", сўнгги клуби - "Атлетико Мадрид")

33 ёшли уругвайлик ҳимоячи "Атлетико" учун нақд 9 йил ўйнади. Ўтган йили Годин жамоа сардори бўлганига қарамай, "матрасчилар" раҳбарияти клуб фахрийси билан шартномани узайтиришни хоҳламади. "Атлетико"да 30дан ошганларга фақат бир йиллик шартнома таклиф қилиш қоидаси мавжуд. Уругвайлик бундай шартларга рози бўлмади ва кетишга қарор қилди. Июль ойи бошида у "Интер" билан уч йиллик шартнома имзолади.

Жанлуижи Буффон (эркин агент - "Ювентус", сўнгги клуби - ПСЖ)

Буффон ва "кекса синьора"нинг ажралиши атиги бир йил давом этди. 41 ёшли дарвозабон "Ювентус"га эркин агент сифатида қайтди ва бир йиллик шартнома остига имзо чекди. Тажрибали кипер ўзининг собиқ жамоасига ҳурматини сақлаб қолган ҳолда келди. У Жоржо Кьеллинидан сардорлик боғичини ва Войцех Шеснини биринчи рақамли дарвозабон мақомини олишни рад этди. Шунингдек, Буффон жамоага янги келганлар кечасида бирга иштирок этди. Қария шу куни даврада Доменико Модугно Воларенинг машҳур қўшиғини ижро этиб берди.

Родриго Эрнандес ("Атлетико Мадрид" - "Манчестер Сити")

Родриго Эрнандеснинг трансфери "Манчестер Сити" тарихида амалга оширилган қимматбаҳо харидга айланди. "Атлетико" хавбеки учун 70 миллион евро сарфланди. Родри янги клуби билан 5 йиллик шартнома имзолади. Хосеп Гвардиола 23 ёшли футболчини "Сити" услубида янги Бускетсга айлантириши мумкин. Ёш ярим ҳимоячи ҳужумда ўйнаш баробарида ҳимояда ҳам бирдек ҳаракат қилади. Родри ҳужум сурьатини ошириб уни ривожлантиради. У тўпни аьло даражада назорат қилади ва прессинг вақтида ишончли ўйнайди. Пеп Фернандиньога муносиб рақобатчи топган кўринади.

Маттейс де Лигт ("Аякс" - "Ювентус")

Трансферлар ойнаси очилишидан олдин, ёзда "Аякс"нинг 19 ёшли истеьдоди клубни тарк этиши аниқ бўлиб улгурганди. Европанинг топ-клублари де Лигтга даьвогарлик қилишди, улар орасида ПСЖ ва "Барселона" ҳам бор эди. Матейс "Ювентус"ни танлади ва жамоа билан 5 йиллик шартнома тузди. Бьянконерилар голландияликни етарли ўйин амалиётига эга бўлишини кафолатлади ва футболчига юқори ишонч билдирди. "Ювентус" де Лигт учун 75 млн. евро тўлади ва ушбу сумма бонуслар ҳисобига яна 10,5 миллион евро ортиши мумкин.

Жоау Феликс ("Бенфика" - "Атлетико Мадрид")

19 ёшли ўспирин "Бенфика" асосий жамоаси таркибида 43 ўйинда майдонга тушиб, 20 та гол урган ва 11 та самарали узатмани амалга оширган. Футболчи ёш бўлишига қарамай, "Атлетико" у учун 126 миллион евро сарфлади. Шундай қилиб, Фелиш "матрасчилар" тарихидаги энг қиммат трансферга айланди шу билан биргаликда у энг қиммат португалиялик ўйинчи бўлди. Кўринишидан унинг трансфери учун тўланган маблағ футболчига умуман босим ўтказмаётган тасаввур уйғотмоқда. "Реал" йирик ҳисобда мағлуб этилган ўйинда Жоау янги клубидаги дебьют голини урди ва 2та голли пас берди.

Антуан Гризманн ("Атлетико" - "Барселона")

Антуан Гризманннинг "Барселона"га ўтиши ёзнинг энг шов-шувли трансферига айланди. "Матрасчилар"нинг янги мавсумга таёйргарлиги учун клуб базасига келмаган Гризманн адвокатлари орқали клуб раҳбариятига 120 млн. еврога уни сотишларини сўраб мурожаат қилди. Июль ойида керакли миқдордаги суммани тўланди, шундан сўнг у "Барселона" билан 5 йиллик шартнома имзолади. Бироқ футболчининг трансфери бекор қилиниши эҳтимоли бор. "Атлетико" хўжайинларининг таькидлашича, каталонияликлар футболчи билан келишувни март ойида, яьни ўйинчини товон пули 200 млн. евролигида музокараларни бошлашган. Шу сабабли, "матрасчилар" "Барселона"дан яна 80 миллион евро тўлашларини талаб қилишмоқда. Улар ҳатто бу борада судга мурожаат қилишмоқчи. Эндиликда Ла Лига президенти Хавьер Тебаснинг қарорига кўра, ваколатли органлар Гризманн трансфери юзасидан текширув ўтказишмоқда.