Гесс захира ўриндиғида ўтирмаяпти. Нега?

Аниқроғи, 20-турдан сўнг “бургутлар” мураббийлар штабида сезиларли ўзгаришлар юз берди. Бош мураббийликка таниқли мутахассис Эдгар Гесс олиб келинди. Унга Олег Тюлькин, Виталий Легай ҳамда Сервер Эсетов ёрдам бермоқда.

“Андижон” навбатдаги янги мураббий қўли остида 21-турда “Навбаҳор”га қарши биринчи ўйинини ўтказди.

Эътиборимизни тортган жиҳат, мазкур учрашувда Гесс ва дарвозабонлар мураббийи Эсетов учрашув қайдномасига киритилмади. Табиийки шундан сўнг учрашувни захира ўриндиғида ўтириб кузатмади. Эдгар Яковлевич шу куни  жамоа ижрочи директори Шуҳратбек Ўринбоев билан баҳсни трибунада, мухлислар қаторида кузатиб борди. Гоҳ-гоҳида ёрдамчиларига ўйин борасида қилиниши керак бўлган ўзгаришлар ҳақида гапириб турди. Гарчи бош мураббий захира ўриндиғида бўлмасада, футболчилар ҳужумкор ўйин намойиш этиб, водий дербисида 3:1 ҳисобида ғалаба қозонди.

Учрашувдан сўнг ўтказилган матбуот анжуманига ҳам ёрдамчи мураббий Тюлькин кириб, ОАВ саволларига жавоб берди.

Кейинги турни сафарда “Насаф”га қарши ўтказган “Андижон”ни ушбу баҳсга ҳам ёрдамчи мураббийлар олиб тушди. Худди юқоридаги каби холат. Бизнингча бунга сабаб Гесс билан клуб ўртасида расмий шартнома тузилмаган. Чунки жамоа янги мураббий ва футболчи билан ўзаро битимга имзо чекиб, уни ПФЛга тақдим этсагина рўйхатдан ўтказишга руҳсат берилади. Шу боис Гесс билан Эсетов ўйин қайдномасига киритилмаётган бўлиши ҳам мумкин. Эҳтимол клуб раҳбари янги мураббийлар билан “Насаф” билан учрашувдан кейин расмий келишувга эришгандир. Яна ким билади дейсиз?

Ёдингизда бўлса, иккинчи давра арафасида “Андижон”га келиб кетган Сергей Шевченко билан ҳам шунга ўхшаш ҳолат кузатилганди. Украиналик мутахассис клубга келиб, амалда расмий шартнома тузмасдан ишни бошлаб юборган. Шевченко ҳам айрим ўйинларда захира ўриндиғида ўтирмасдан, четдан туриб кузатиб, ёрдамчиларига кўрсатма бериш билан кифояланганди.

Гесс билан ҳам шундай ҳолат такрорланиши мумкин. Буни вақт кўрсатади.