Футзал. "Локомотив" - "Бунёдкор" учрашувидан сўнг мураббийлар фикрлари

Мусобақанинг очилиш ўйинида Тошкент шаҳринг икки жамоаси "Локомотив" ва "Бунёдкор" клублари ўзаро тўқнаш келдилар ва учрашувда темирйўлчилар 4:1 ҳисобида ғалабага эришдилар. 

Қуйида ўйин якунида ҳар икки жамоа мураббийлари томонидан билдирилган фикрлар эътиборингизга ҳавола этилади.

Фарҳод Мираҳмедов ("Локомотив" мураббийи) - Янги мавсумдаги биринчи учрашувда иштирок этдик. Янги тўплар берилди. Қолаверса бу паркетда тўп юриши қийин кечди. Нафақат биз, рақиб ҳам қийналди. Тўпни оширишда муаммолар юзага келди. Футзал чемпионатимизда яхши жамоалар кўпайди. "Бунёдкор" таркибидаги ёшлар анча ўсишга эришди. Бизнинг таркибимизда терма жамоа футболчилари бўлишига қарамасдан, рақиб муносиб қаршилик кўрсата олди.

Абдулла Бўриев ( "Бунёдкор" бош мураббийи") - Авваломбор барча футзал мухлисларини мавсумнинг очилиш учрашуви билан табриклайман. Ўйлайманки, чемпионатимиз бу йил анча қизиқарли ва шиддатли руҳда ўтади. Кўп жамоалар деярли бир хил даражада, десам муболаға бўлмайди. Мавсумга тайёргарликни август ойидан бошладик. Тайёргарликни яхши олиб бордик. Ўртоқлик учрашувлари ўтказилди. Бугун мавсумдаги илк ўйинимиз эди. Йигитлар бироз қийналишди. Умуман олганда бир хил ўйин бўлди. Имкониятларидан фойдаланган жамоа ғалаба қозонди. Кейинги ўйинларда бугунги хато ва камчиликларни бартараф этиб ижобий натижа кўрсатишга ҳаракат қиламиз.