Фарҳод Нишонов "Локомотив"га қарши ўйиндан кейин: "Ғалабага ҳақли эдик, бошқа вазиятларимиздан фойдаланганимизда ҳисоб йириклашиб кетарди"

Ўйин ҳақида

- Айтганингиздек, бугунги ўйин жуда муҳим эди. Бизда тайёргарлик учун вақтимиз кўп эмасди. "Локомотив"нинг турнир жадвалидаги ўрнидан келиб чиқсак, биз ғалаба қозонишимиз шарт эди. Агар биз очко ололмасак, "Локо" анча илгарилаб кетиши мумкин эди. Буни йигитлар тушунишди, ҳис қилишди ва майдонга тушиб, ҳаққоний ғалаба қайд этишди.

- Ғалабанинг асосий мезони нимада деб ўйлайсиз?

- Про-лигада уч очко олиш қийин бўляпти. Жамоалар ўйинга қаттиқ тайёргарлик кўришяпти. Асосийси - йигитлар бугун мен хоҳлаган футболни намойиш қилиб беришди. Ҳа, баъзи вазиятларда айтганимдек ҳаракат қила олишмагандир. Лекин кўряпман, ўйиндан-ўйинга ҳолат яхшиланиб бормоқда. Ўзларига бироз ишонч бера олишди ва шу сабабли ғалаба қозондик деб ўйлайман. Рақибни жуда жиддий ўргангандик, шунга яраша тайёргарлик кўргандик. Бу ҳам бизга қўл келди.

- "Локомотив" ҳалиям фаворитми?

- "Локомотив" бугун мағлубиятга учраган бўлса-да, улар билан ҳали ўйинларимиз кўп. Бугун 10 киши бўлиб қолгандаям "Локо" фаворит бўлиб турди, вазиятлар яратяпти, охиригача ҳаракат қиляпти. Таркибида ўйнаётган футболчилари жуда тажрибали. Уларни эсдан чиқариш керак эмас. Йигитларим ўйиндан кейин ҳиссиётларга берилишди, бақиришди, ғалабани нишонлашди. Лекин эсдан чиқариш керак эмас, барибир лигада "Локомотив" - фаворит.

- Ўйиндан олдин "Локомотив"ни ўрганганингизда жамоанинг қандай камчиликларини кўрдингиз?

- Камчиликлардан кўра рақибнинг устунликларига тайёргарлик кўрдик. Улар стандартларда, аутларда яхши ҳаракат қилишини билдик. Ўзига яраша камчиликлари бор. Шулар орқали биз кўп вазият яратдик, улардан фойдалана олмадик. Агарда фойдаланганимизда ҳисоб бошқача бўлиб кетарди.