Эртага "Пахтакор" сафарда илк ғалабасини нишонлайдими?

Бугун "Пахтакор" янги бош мураббий Шота Арвеладзени кенг жамоатчиликка таништирув маросимини ўтказади. Лекин бу янги мураббий бугуннинг ўзидаёқ жамоани қабул қилиб олади дегани эмас. Бизга маълум бўлишича, футболчиларни эртанги ўйинга ҳам Жасур Абдураимов тайёрлайди ва грузиялик мураббий иккинчи даврадан жамоани ўз қўлига олади.

Эртага "Пахтакор" бу йил ҳисобидан биринчи марта сафарда ғалаба қозониши мумкин. Ҳозирча жамоа сафарда 6та ўйинда майдонга тушган бўлса, шундан учтасида дуранг ўйнаган ва уч бор мағлуб бўлган. Тўплар нисбати 2-10. Албатта, "Пахтакор"дек клуб учун сафарда атиги иккита гол уриш жуда ғалати.

Эртанги рақиб "Обод" ҳозирги шароитда кучли эмас. Тўғри, "Обод" ўз майдонида "Динамо" билан чиройли ўйин кўрсатди, лекин шундан сўнг кетма-кет учта учрашувда мағлуб бўлди. Бу аҳволда эртага бу жамоа "Пахтакор" билан қандай ўйнайди, ҳайронмиз.

"Пахтакор" Жасур Абдураимов қўл остида чиройли ўйин кўрсатаётгани йўқ, лекин натижа бор. Ҳозирча "шерлар" ушбу мураббий билан еттита ўйинда иштирок этиб, шундан тўрттасида ғолиб чиқишди. Яъни, "Пахтакор" Жасур Абдураимов бошчилигида уйдаги ҳамма ўйинларни ютди, бироқ сафарда икки бор дуранг ўйнаган бўлса, бир марта мағлубиятга учради.

Агар "Пахтакор" эртага "Жар" стадионида ғалаба қозонадиган бўлса, бу "Пахтакор"нинг сафардаги илк уч очкоси бўлади. Мабодо "Обод" зафар қучса, бу Инилеев шогирдларининг уйдаги иккинчи ғалабаси бўлади.