Эрон собиқ бош мураббийи ФИФАдан жавоб кутяпти

Гап шундаки, ишдан кетган бельгиялик мураббий Эронда ишлаган пулларини тўлиқ ола билмаяпти. Шу боис ФИФАга ёзишга мажбур бўлди. Марк Вильмотс ўтган йилнинг май ойида терма жамоани қабул қилиб, форсларни атиги 6та ўйинда майдонга бошлаб тушди. 

ЖЧ-2022 саралаш баҳсларида икки бор мағлубиятга учрагач, Эрон футбол федерацияси мураббийни ишдан бўшатди ҳамда унга тегишли пулларнинг бир қисмини бермади. "Мен чиндан ҳам ФИФАга шикоят қилдим ва энди бунинг жавобини кутяпман", - дейди бельгиялик мураббий. 

Марк Вильмотс қўл остида Эрон терма жамоаси Гонконг ва Камбоджани мағлуб этиб, бироқ Баҳрайн ва Ироққа имкониятни бой берди. Ҳозирда бу жамоа ўз гуруҳида 3-ўринни эгаллаб турибди. 

Эрон футбол федерацияси Бош котиби Меҳди Моҳаммад Наби шундай деди: "Вильмотс ФИФАга шикоят қилганидан хабаримиз бор. Лекин шунга қарамай, биз унинг пулларини тўлаб бермоқчи эмасмиз. Чунки бу мураббий терма жамоани масъулиятсиз бошқарди. У ишини охиригача етказмади, шу боис биз ҳам тўлиқ ҳисоб-китоб қилмаймиз".