Элит ОЧЛ. Рўзиқул Бердиев: "Қийин кунларни бошдан кечиряпмиз"

Ўйиндан кейинги матбуот анжуманида "Насаф" клуби бош мураббийи Рўзиқул Бердиев иштирок этди. 

- Ўйин ҳақида фикрингиз?

- Ҳимояда ўйинимиз унчалик қовушмади, бу эса рақибга қўл келди. Ҳужумда ҳам ишимиз юришмади. "Трактор" тартибли ҳимояланишини билардик ва шундай бўлди ҳам. Жамоамизда нималар бўлаётганини жуда яхши биламан. Қийин кунларни бошдан кечиряпмиз. Тўғриси, ҳозирги кунда ўйинимизни бундан ортиқ кучайтира олмаймиз. Афсуски, ҳужумда қандайдир енгиллик етишмади. Бу мусобақада ҳар бир ўйин биз учун қийин кечяпти.

- Ойбек Бозоров, Мурод Раҳматов, Зафармурод Абдираҳматов каби футболчилар бугун нега майдонга тушмади?

- Абдираҳматов сариқ карточкалар сабаб ўйинни ўтказиб юборди. Мурод Раҳматов ҳам биз учун катта йўқотиш бўлди, чунки уни жамоамизни тарк этган Акмал Мозговой ўрнида кўргандик. Афсуски, жароҳати сабаб ўйнай олмади. Ойбек Бозоровга келсак, охирги пайтларда жароҳатлар кўпайиб кетди, шу боис қайдномага киритмадик.

- Элит ОЧЛдаги бешта ўйинда "Насаф" 14та гол ўтказди. Нима деб ўйлайсиз, рақиблар кучлилик қилдими ёки ҳимояда хатолар кўпми?

- Тўғриси, кўп хато қилдик деб ўйлайман. Биронта ўйин йўқки, хатосиз ўтказган бўлсак. Тўғри, рақиблар ҳам кучли, лекин биз хато қилмаслигимиз керак эди. Бугунги рақибни олайлик, биздан бир бош баланд эмасди. "Трактор" тартибли ҳимояланди, лекин яққол кучлилиги кўринмади. Мағлубият учун футболчиларни айбламоқчи эмасман, биринчи жавобгар шахс аввало ўзимман. Биз жуда оғир ҳолатга тушиб қолдик. Ҳам ўзимизда, ҳам халқаро майдонда қийинчиликка дуч келдик. Нимага бундай бўлаётганини фақат ўзимиз яхши биламиз. "Трактор" бешта ўйинда битта гол ўтказибди, бу ҳам ҳимоя яхшилигидан.

- "Насаф" ҳар бир турнирда олий мақсад билан қатнашишини кўп бор таъкидлагансиз. Бу йилги мақсад қандай эди?

- Ҳозир чемпионликдан бошқаси "Насаф" учун ёмон натижа бўлиб қолди. Мухлисларни шунга ўргатиб қўйдик. Биз катта ютуқларга секин-аста эришганмиз. Элит ОЧЛдаги иштирокимиз ҳам биз учун сабоқ бўлади. Ҳар бир ўйинни таҳлил қилган ҳолда янада яхши қатнашиш йўлларини қидиряпмиз. Элит ОЧЛ ўз номи билан элит турнир, афсуски, иштирокимиз яхши бўлмади. Ҳеч бўлмаса Суперлигада чемпионликни сақлаб қолишимиз керак эди, лекин уни ҳам қўлдан чиқардик. "Насаф" клубининг даражаси кўтарилгани учун ҳозирги ҳолатимиз ёмон бўлиб кўриняпти.