Элдор Шомуродов: "Умуман олганда ёмон ўйнамадик"
13 окт 22:10
Янгиликлар

Элдор Шомуродов: "Умуман олганда ёмон ўйнамадик"

Ўзбекистон терма жамоаси ҳужумчиси Элдор Шомуродов Уругвайга қарши баҳсдан сўнг ўйин ҳақидаги фикрлари билан ўртоқлашди.

"Кутилганидек оғир ўйин бўлди. Иккинчи бўлимнинг дастлабки 15-20 дақиқасида эътиборни бироз йўқотдик ва рақиб бизни жазолади. Умуман олганда ёмон ўйнамадик. Камчиликлар бор, улар устида ишлашимиз керак. Янги мураббий билан ҳали кўп жиҳатлар устида ишлаймиз", - деди Элдор Шомуродов баҳс якунлангач.

- Бугун жисмоний жиҳатдан бироз оқсадик. Техник ёки бошқа жиҳат бўйича эмас, айнан жисмоний ҳолатимиз бўйича фикр билдирсангиз...

- Биринчи навбатда таркиб бироз ўзгарди. Шуни ҳам ҳисобга олиш керак. Баҳона деб туюлиши мумкин, аммо икки кун олдин учиб келдик. Ўтган учрашувдан кейин тўлиқ тикланмадик ва тўлиқ машғулот ўтказмаган эдик. Фақатгина кеча тўлиқ машғулот ўтказдик.

- Каннаваро келганидан сўнг ўйин схемаси кескин ўзгармади. Ғаниев бугун ўнг қанотда ўйнади. У ўзига хос бўлмаган позицияда ўйнагани бироз ноқулайлик туғдиргандек...

- Азиз учун қулай позиция бўлмади, лекин Азиз ҳам ёмон ўйнагани йўқ. Мураббий шундай танлов қилди. Рақиб ҳақиқий кучини кўрсатди ёки майдонда бор кучимизни кўрсата олдик дея олмайман. Майдон ҳолати ҳам аъло даражада эмас эди. Бундай майдонда ҳар бир жамоанинг кучлари тенглашиб кетади.