Элдор Шомуродов: “Осиёнинг энг яхши ёш ўйинчиси ким бўлишини аҳамияти йўқ. Муҳими ўзимиздан бўлади”

Эътиборлиси уларнинг уччаласи ҳам “Бунёдкор” вакилларидир. Бундан бир неча йил олдин кўпчиликни эътиборига тушмаган. Аммо ўтган мавсумдан бери ўзини кўрсатишга эришаётган Достон Ҳамдамов, Забиҳилло Ўринбоев ва Элдор Шомуродов жорий мавсум ҳақиқатдан ҳам “қалдирғочлар” сафида ўз ўрнига эга бўлди. Сурхондарёлик бўлган иқтидорли ҳужумчи Элдор Шомуродов учун бу йилги мавсум ажойиб ўтмоқда дейиш мумкин. Миллий терма жамоамиз устози Самвел Бабаян ҳам унинг иқтидорини пайқаган холда бош жамоамизга таклиф этиб, айрим ўйинларда ўзини кўрсатиш учун имконият бермоқда. Ўйиндан-ўйинга ўз кучига ишониб бораётган Элдорда аввалги ҳаяжонларни кўрмаяпмиз. Аксинча етакчиларга хос тарзда ўйин намойиш этиб келмоқда. Куни-кеча Шомуродовларнинг кенжаси билан суҳбатлашиб, хушхабар ҳақида сўрадик.

- Элдор, кайфиятлар қандай?
- Худога шукур ҳаммаси яхши. Ўзингизга яхши маълум айни дамда кўплаб клублар таътилга чиққан. Ўз навбатида мен ҳам бундан унумли фойдаланган холда оилам даврасида хордиқ чиқаряпман. 

- Осиёнинг “Энг яхши ёш ўйинчиси” номинацияда ғолиблик учун курашда сизнинг номингиз ўрин олгани ўзиз учун кутилмаган хол бўлдими?
- Эҳ, нимасини айтасиз. Хурсандчилигимни чеки йўқ. Бу ҳақда биринчи бўлиб клубимиз матбуот котиби Баҳодир ака Мирзаев хабардор этди. Жуда ҳм тўлқинланиб кеттим. Ахир бу ҳар бир футболчининг орзуси! Мен учун кутилмаган совға бўлди.   

- Қизиғи шундаки, ушбу номинацияда ғолиб чиқишингизда асосий рақобатчиларингиз клубдаги дўстларингиз эканлигидир?
- Шундай. Бу шахсан мен учун ҳам қизиқ ҳам яхши бўлди. Сабаби номинацияда бошқа дўстим ғолиб чиққан тақдирда ҳам мен бундан сира тушкунликка тушмайман. Аксинча бош совринни ўзим қўлга киритгандек, дўстим учун ҳам хурсанд бўламан.

- Умуман олганда мавсум-2015 сиз учун омадли ўтди деса бўладими?   
- Албатта. Тўғри, клуб билан бу йил ҳам ҳеч бир совринни қўлга кирита олмадик. Бунга сабаб сифатида эса барқарорлик етишмаганини айтган бўлардим. Кўпинча тажриба етишмаслиги панд берди. Худо хоҳласа келаси мавсум “Бунёдкор” чемпионлик учун курашади.

Исломбек Рустамбеков суҳбатлашди.