Элдор Мойлиев: "Бугун энг ёмон ўйинларимиздан бирини кўрсатдик"

- Ўйин ҳақида фикрингиз?

- Баҳсни яхши бошладик, иккита қулай вазият яратдик. Лекин гол ура олмадик. "Динамо" эса икки бор стандарт вазиятдан унумли фойдаланди. Рақиб иккита гол уриб олганидан сўнг бизда ўйин фақат орқага кетди. Иккинчи бўлим тўлиқ "Динамо" устунлигида кечди. Бугун энг ёмон ўйинларимиздан бирини кўрсатдик.

- Жамоангиз Суперлигада рақибларга кураш таклиф этиб келяпти. Лекин бугунги ўйинда умуман ўзини кўрсата олмади. Бу Суперлига бошқа, Кубок бошқа мусобақа бўлгани билан боғлиқми?

- Биз Кубок ўйинига яхши ҳозирлик кўргандик, лекин бугун нимадир ўхшамади. Ўтказилган иккита гол руҳан синдириб қўйди. Бундан ташқари бирга бир вазиятларнинг барчасида енгилдик. "Динамо" бу учрашувга яхши ҳозирлик кўрибди.

- Футболчиларда ғалаба учун иштиёқ йўқдек.

- Қўлдан келганча ғалабани кўзлаб майдонга тушгандик. Агар ютганимизда ярим финалга чиққан энг кучли 4 жамоадан бири бўлардик. Буни ҳаммамиз яхши тушуниб тургандик. Афсуски, ўйин биз ўйлагандек кечмади. "Динамо" ҳар жиҳатдан кучлилик қилди.