Эксперт фикри. Мурод Исмоилов: "Нефтчи" чемпионликка катта қадам ташлади, "Насаф" осонликча таслим бўлмаса керак"

Фарғона мезбонлик қилган "Нефтчи"  - "Насаф" учрашувида мезбонлар 1:0 ҳисобидаги ғалабани тантана қилди. Бу орқали Виталий Левченко шогирдлари рақиби билан очколардаги фарқни қисқартириб олди ва чемпионлик учун курашда давом этадиган бўлди. Мазкур учрашув юзасидан тажрибали мутахассис ва мураббий Мурод Исмоиловнинг фикрларини тингладик. 

"Олти очколик ўйинда "Нефтчи" ғалаба қозонди. Бу ғалаба билан барча фарғоналик мухлисларни табриклайман. "Насаф" жамоасига кейинги ўйинларда омад тилайман. 

Курашга бой ва кучли ўйин бўлганлиги кўриниб турди. "Насаф" ўйин назорати, узатмалар аниқлиги, бурчак тўплари борасида устунлик қилгани маълум, лекин натижада ягона пенальтидан урилган гол ўйин тақдирини ҳал қилди. Бу ерда муҳими статистика ёки чиройли ўйин эмас, ғалаба. Шахсан вилоят ҳокимимиз ўйиндан олдин катта мотивация бергандилар. Ўйинни бевосита стадиондан кузатдилар ва хурсандчиликларини мухлислар билан баҳам кўрдилар. Бу чемпионлик учун катта қадам деб ҳисоблайман. "Нефтчи"га навбатдаги ўйинларда ҳам ғалабалар тилайман. Йигитлардан шу руҳда давом этишларини сўраб қоламан. 

"Насаф" ҳали ўз сўзини айтади, бу жамоа доим юқори натижаларга интилиб келган. Шундай экан чемпионликни осонликча топшириб қўймаса керак деб ўйлайман. Рўзиқул Бердиев ва унинг жамоаси охиригача курашади. Футбол мухлисларини яна бир бор табриклаб қоламан",- дейди Мурод Исмоилов.