«Динамо» - «Металлург»: Устунлик кимда?

ЎЙИННИ ҚОСИМОВ БОШҚАРАДИ

Ўзбекистон миллий чемпионати 16-тури доирасидаги Самарқанд ва Бекобод жамоалари ўртасидаги учрашувни бошқариб борадиган ҳакамлар бригадаси маълум қилинди. Унга кўра, ўйин Шерзод Қосимов бошчилигидаги тошкентлик ҳакамлар бригадасига ишониб топширилган. Учрашув назоратчиси Рашид Айтеков бўлса, ЎзПФЛ вакили сифатида Бобур Ҳайдаров ташриф буюради.

Олий Лига, 16-тур
5 август, шанба
«Динамо» (Самарқанд) – «Металлург» (Бекобод)
Ҳакамлар: Ш. Қосимов (Тошкент), Т. Галеев (Тошкент), А. Пўлатов (Тошкент), Э. Турсунов (Бухоро)
Назоратчи: Р. Айтеков (Тошкент).
ЎзПФЛ вакили: Б. Ҳайдаров.
Учрашув бошланиш вақти: 18:00.

ТАРКИБДА ҚАНДАЙ ЎЗГАРИШЛАР?

«Динамо» жамоаси давралар оралиғида таркибда жиддий ўзгаришлар қилишга эришди. Клубни Абдужамол Исроилов, Дамир Низанов, Омаджон Тайлоқовлар тарк этишган бўлишса, уларнинг ўринга ҳужумчи Фарҳод Тожиев, ҳимоячи Аднан Ораховац ва яримҳимоячилар Муҳаммад Исаев, Дониёр Исмоиловлар келиб қўшилишди.

«Металлург» таркибидаги ўзгаришларга эътибор қаратадиган бўлсак, клубни Суҳроб Султонов, Ислом Қобилов, Достонбек Турсунов, Камронбек Копадзе, Вусол Магерамов, Дониёр Исмоиловлар тарк этишди. Янги футболчилар сифатида «Обод»дан Аброр Ҳусаинов ҳамда «Бунёдкор»дан Жавоҳир Эсонқуловлар қайтишди.

БИРИНЧИ ДАВРАДАГИ ЎЙИН

«Динамо» жамоаси ушбу рақиб билан сўнгги бор Олий Лига 1-тури доирасида Бекободда учрашган эди. Ушбу баҳсда «Динамо» жамоаси кўпчилик учун кутилмаганда «Металлург»ни сафарда 0:2 ҳисобида мағлуб этиб қайтган эди. Дастлабки гол автогол сифатида қайд этилган бўлса, 89-дақиқада Акмал Бозоров жамоамизнинг иккинчи голини киритиб, ғалабани таъминлаганди.

ЎЗАРО ЎЙИНЛАР: УСТУНЛИК КИМДА?

Самарқанд ва Бекобод клублари Олий Лига доирасида 35 маротаба ўзаро тўқнаш келишган. Шу ўйинлардан 17 тасида самарқандликлар ғолиб бўлишган, 10 та ўйинда “Металлург” ғалаба қозонган. Ўзаро ўйинларда 8 марта дуранг натижаси қайд этилган. Тўплар нисбати “Динамо” фойдасига 53:38ни ташкил қилмоқда. Бу ўйинларда “Динамо” 59 очкони, “Металлург” эса 38 очкони қўлга киритган.

“Динамо”нинг ўзаро ўйинларда бекободликлар устидан қозонган энг йирик ғалабаси – 5:0. “Металлург”нинг “Динамо” устидан қозонган йирик ғалабаси – 3:0.

Самарқандда ўтган сўнгги беш учрашув:
02.05.2015 «Динамо» - «Металлург» 1:0
23.03.2014 «Динамо» - «Металлург» 2:0
29.10.2013 «Динамо» - «Металлург» 1:0
27.08.2012 «Динамо» - «Металлург» 3:2
01.10.2011 «Динамо» - «Металлург» 3:1

15 ЙИЛЛИК АНЪАНА…

Жамоаларнинг ўзаро ўйинларига назар ташлаб шуни билиш мумкинки, «Динамо» сўнгги 15 йил давомида «Металлург»ни Самарқандда мағлуб этиб келмоқда. Бекободликлар сўнгги марта 2002 йилда кўхна шаҳардан ғалаба билан қайтишган. Шундан кейин улар бу жамоани мухлислари қаршисида мағлуб эта олишмаган. Самарқанддаги ўйинларда “Динамо” 14 марта уч очкога эга бўлган. 2 та учаршувда дуранг қайд этилган. “Динамо” ўз уйидаги охирги 13 та ўйинда Бекобод клубига мағлуб бўлмаган.

Усмон Ибодов, «Динамо» клуби матбуот хизмати.