Дилшод Ирсалиев: "Гуруҳдан чиқиш қийин бўлади"

Эслатиб ўтамиз, Ўзбекистон терма жамоаси Осиё Кубогида Япония, Жанубий Корея ва Қирғизистон термалари билан бирга "D" гуруҳида кураш олиб боради.

- Дилшод, дастлаб соғлиғингиз ҳақида сўрамоқчи эдим? Билишимча, тиззангиздан жароҳат олгансиз.

- Ҳа, шундай. Ҳозир анча яхши.

- Тахминан қанча муддатда сафга қайтасиз?

- Икки ойдан сўнг.

- Демак, Осиё Кубогида қатнаша оласиз?

- Ҳозирдан ҳеч нарса дея олмайман. Бу менинг жисмоний ҳолатимдан келиб чиқиб ҳал қилинади, ҳаммаси оёғим ўша пайтда қай аҳволда бўлишига боғлиқ.

- Гуруҳдаги рақибларингиз ҳақида нима дея оласиз?

- Гуруҳдан чиқиш жуда қийин бўлади деб айта оламан. Ҳозир ҳамма жамоалар яхши ўйнамоқда.

Яқинда бўлиб ўтган саралашда Қирғизистонни 5:1 ҳисобида мағлуб этгандик. Жанубий Корея эса одатда Осиё Кубокларида у қадар яхши иштирок эта олмайди.

Ҳаммаси оддий, Осиёда барча жамоалар ғалаба учун ўйнашади.

- Сизнингча "ўлим" гуруҳи қайси?

- Менимча, Эрон, Австралия, Хитой ва Индонезия жой олган "B" гуруҳи. Жуда яхши жамоалар жам бўлган, кураш кескин кечади.

Кўпчилик бизнинг гуруҳимизни "ўлим" гуруҳи деб айтмоқда. Балки шундайдир, бизни гуруҳда ҳам кучли жамоалар йиғилган.

- Ўзбекистон терма жамоасининг олдига Осиё Кубогида қандай вазифа қўйилган?

- Финалга чиқиш.