Дидье Дешам: "Тактика борасида ўйлашга вақт бўлгани йўқ"

- Францияда Европа чемпиони бўлиш учун ажойиб имконият мавжуд. Бу ерда сен неча ёш эканлигини фарқи йўқ, имконият борми, демак бундан унумли фойдаланиб қолиш лозим. Футболчи 18 ёш бўладими, 20 ёшми, совринни қўлга киритиш имконияти борми, унда ҳаракатни ошириши лозим. Франция терма жамоасидаги барча футболчилар финалда ўйнаш бахтига муяссар бўлишганини тушуниб туришибди. Бу катта воқеалик.

Германияга қарши ярим финал баҳсидан сўнг финалга қандай тактика қўллаш ҳақида ўйлашга вақт бўлгани йўқ. Муҳими жамоа тезда тикланиб олиши керак эди. Ишончим комилки, йигитлар финалга тўлиқ тайёргарлик билан ўйнашади. Бу кўпчилик учун фаолиятидаги энг муҳим ўйинларидан бири, балки энг муҳими ҳам бўлиши мумкин. Европа чемпионати финали, Парижда, ўз суюклилари олдида ўйнаш бу катта шараф.

Мени Евро-2000даги футболчи сифатида қўлга киритган муваффақиятим бу ўтмишда қолган. Ҳозир умуман бошқа тарих. Мен энди Франция терма жамоаси бош мураббийи сифатида қатнашаман. Яна жамоанинг бир бўлаги бўлиб турганимдан фахрланаман.

Португалия жуда кучли жамоа. Улар бежизга финалга қадар етиб келишгани йўқ. Франция каби Португалияни ҳам мусобақа стартида жуда кўп танқид қилишди. Якунда эса улар ҳам, биз ҳам финалга қадар етиб келдик. Португалия жуда кучли ва турли хил тактикаларда ўйнай оладиган қийин рақиб. Уларнинг ҳимоя чизиғи жуда ишончли ўйнайди. Португалия рақибга нисбатан кучли прессинг қўлламайди, аммо уларнинг қарши ҳужумлари жуда тезкор ва хавфли.