Деррик Перейра: "Биз ҳали таслим бўлганимиз йўқ. Тожикистон билан энг яхши ўйинимизни намойиш этамиз"
22 мар 2019 20:12
Янгиликлар

Деррик Перейра: "Биз ҳали таслим бўлганимиз йўқ. Тожикистон билан энг яхши ўйинимизни намойиш этамиз"

U-23 Осиё чемпионати саралаши доирасидаги Ҳиндистон U-23 - Ўзбекистон U-23 (0:3) учрашувидан кейинги матбуот анжуманида меҳмонлар устози Деррик Перейра иштирок этди.

"Бугунги ўйинда бизга тажриба етишмади. Бундан ташқари об-ҳавога кўникиш ҳам қийин бўлди. Шу сабабли ҳам натижа шундай бўлди. Мағлубиятга сабаблардан яна бири сифатида Тошкентга жуда ҳам кеч етиб келганимизни айтган бўлардим".

"Маълумот ўрнида айтиб ўтмоқчиманки, мендан олдинги мураббий бир ой олдин истеъфога чиққан. Шу боис 1 ойдан буён ушбу жамоада ишлаяпман. Бундан ташқари футболчилар ўз клубларида ўйнашгани учун тайёргарлик учун фақат бир ой вақтимиз бўлди холос".

"Ўзбекистон терма жамоасини ўрганишга келадиган бўлсак уларнинг олдинги ўйинларини томоша қилдик. Масалан, Япония билан баҳсни кўрдик. Улар техник ва тактик жиҳатдан жуда ҳам кучлилигини билардик. Шунга тайёрланиб келгандик".

"Футболда ҳамма нарса бўлиши мумкинлигини таъкидлаб ўтмоқчиман. Биз ҳали таслим бўлганимиз йўқ. Кейинги ўйинда Тожикистонга қарши энг кучли ўйинимизни кўрсатишга ҳаракат қиламиз ва балки гуруҳдан ҳам чиқармиз", - дейди Деррик Перейра.