Деклан Райс "Вест Хэм" билан хайрлашди

"Вест Хэм"нинг 24 ёшли ярим ҳимоячиси Деклан Райс "болғачилар" билан хайрлашди.

"Ақл бовар қилмайдиган 10 йил якунланганига ишонолмаяпман. "Вест Хэм" майдондаги ва ундан ташқаридаги ҳаётимнинг катта қисми бўлди. Ҳеч қачон хайрлашиш осон бўлмайди. Бу жамоада зўр ҳиссиётларни бошдан кечирдим. Бу ерда мен шахс, футболчи ва сардор сифатида улғайдим. Мен учун Конференция Лигасидаги ғалаба торт устидаги гилос эди. "Вест Хэм" қанчалик ўзгача эканлигини ҳамма билади. Ажойиб хотиралар ва ҳаётимдаги энг яхши кунлар учун раҳмат. Барчангизни яхши кўраман", – деб ёзди Райс ижтимоий тармоқда.

Эслатиб ўтамиз, Райс 2017 йилнинг июлидан бери "Вест Хэм" асосий жамоасида ўйнаб келмоқда. Ўшандан бери у "болғачилар" сафида 245 та ўйин ўтказиб, 15 та гол урган ва 13 та голли узатмани амалга оширган.