Даврон Файзиев: "Машъал"ни ҳаққоний ғалаба билан табриклайман"

"Машъал"ни ғалаба билан табриклайман. Бугун рақиб бизни ютгани йўқ, ўзимизнинг хатоларимиз туфайли мағлуб бўлдик. Дастлабки дақиқаларда голлар ўтказиб юбордик. 0:3 ҳисобида ютқазиб туриб ўйинни ўз томонимизга оғдириш жуда қийин иш.

Йигитларга ҳеч қандай эътирозим йўқ, улар қўлларидан келганича ўйнашди. "Машъал" биринчи даврада ҳам яхши ўйнаб келаётганди. Мағлубиятни ҳам мард бўлиб тан олиш керак. Бугун натижа борасида ютқаздик, аммо ўйин борасида улардан қолишганимиз йўқ. Ҳаққоний ғалаба билан "Машъал"ни табриклайман.

"Динамо"га ўтишим ҳақидаги хабарлар миш-миш эди. Бугун "Сўғдиёна"ни майдонга бошлаб тушдим, демак ҳалиям шу ерда ишлаяпман. Раҳбарият менга тўлиқ ишонади. Иш тўғри йўлга қўйилса натижа ҳам келади, бунга оз қолди. Олдимиздаги мақсад олий лигада қолиш. Вазиятга реал қарасак жамоа элитада қолишга қодир.

"Олександр Коблаш ҳақида гапирадиган бўлсак, бу футболчи "Навбаҳор"да кўрикда бўлди. Сўнгра "Андижон"да ўйнади. У охирги икки-уч кунда тиббий кўрикдан ўтди, кейин трансфер қоғози келмади, Тошкентга бориб келди. Шу боис бугун уни захирадан туширдим", - дейди Даврон Файзиев.