Дани Алвес "Барселона"дан нега кетганини айтиб берди

"Барселона" жамоасининг собиқ ҳимоячиси Дани Алвес 2016 йилда Каталония клубини қандай тарк этганини эслади.

“Мен худбин ёки ёвуз одам эмасман. Албатта, "Барселона"ни соғинаман ва ҳар доим шундай бўлиб қолади, чунки у ер менинг уйим. Куни кеча яқинларимга саккиз йил "Барселона"да ўйнаб, захира эшигидан чиқиб кетганимни айтиб бердим.

Ўша пайтда хафа бўлдим, чунки мен "Барселона" учун кўп нарса қилдим, улар эса менга янги шартнома таклиф қилишни исташмади. Ўшунда шунчаки энг яхши мавсумимни ўтказдим, аммо ўзимни қадрли ҳис қилмадим.

"Реал" ва бошқа жамоалар менга икки баравар кўпроқ суммани таклиф қилишган, бироқ мен "Барселона"ни танлаганман. Вақти келганида кетиш тўғрисида қарор қабул қилиш ҳуқуқига эга бўламан деб ўйлагандим, олд эшикдан байрамона чиқиб кетмоқчи эдим.

Мен жуда ноқулай вазиятда қолгандим. Аввал айтиб ўтганимдек, бошқа жойга бориб ўз қадр-қимматимни исботлаб, кейин қайтиб келишни ўйлаганман", – деди ҳозирда "Сан-Паулу"да ўйнаётган Алвес Marca нашрига берган интервьюсида.