Чемпионлар лигаси учун кураш. "Арсенал" vs "Манчестер Юнайтед"
07 май 2017 17:43
Янгиликлар

Чемпионлар лигаси учун кураш. "Арсенал" vs "Манчестер Юнайтед"

Бугун Тошкент вақти билан 20:00да "Эмирейтс" стадионида "Арсенал" ҳамда "Манчестер Юнайтед" ўртасидаги АПЛнинг 36-тур учрашувига старт берилади.

Ушбу баҳс Чемпионлар лигаси учун кечаётган қизғин курашга ойдинлик киритиши мумкин. Айни дамда турнир жадвали қуйидаги ҳолатда:

Тўлиқ жадвал ва тўпурарлар рўйхати билан бу ерда танишасиз: АПЛ ТУРНИР ЖАДВАЛИ

Таркибдаги йўқотишлар

Ушбу баҳсда мезбонлар ярим ҳимоячиси Гранит Жаканинг иштирок этиши сўроқ остида, бироқ ҳимоячи Шкордан Мустафи машғулотларга қайтди ва посбон Давид Оспина ҳам соғ.

"Манчестер Юнайтед" сафида Маруан Феллайни ва Эшли Янг учрашувни ўтказиб юборади. Бельгияликда дисквалификация бор, Янг эса жароҳатини даволамоқда. Тимати Фосу-Менсанинг иштирок этиши сўроқ остида, Маркус Рашфордда эса кичик шикастланиш бор.

Қизиқарли маълумотлар

"Арсенал" ўтган мавсум "Манчестер Юнайтед"ни 3:0 ҳисобида таслим этди, аммо бу муваффақият Премьер-лига доирасида "қизил иблислар"га қарши ўтказилган сўнгги 11 учрашувдаги илк ғалаба ҳисобланади (4 та дуранг, 6 та мағлубият).
Уэйн Руни "Арсенал"га қарши баҳсларда 11 та гол урган ва у Премьер-лига тарихида "тўпчилар" дарвозасини энг кўп ишғол этган футболчи ҳисобланади.
Жозе Моуриньо "Арсенал"га қарши 12 та Премьер-лига учрашувида бирор маротаба мағлуб бўлмаган (5 та ғалаба, 7 та дуранг)

Мураббийларнинг қисқача фикрлари

Арсен Венгер: "Биз ўз ўйинимизга эътибор қаратамиз. Жамоамизда ғалаба қозонишдан бошқа йўл йўқ".

Жозе Моуриньо: "Биз "Арсенал"га қарши баҳсда 5:0 ёки 6:0 ҳисобида ғалаба қозонамиз деймайман. Натижа учун курашамиз".