"ChaCha Мустақиллик кубоги-2018". "Пахтакор" - чемпион!

Ушбу мусобақадаги энг катта ёш 2006 йилда туғилган футболчилар ўртасидаги курашда эса "Пахтакор" футбол мактаби тарбияланувчилари ғолибликни қўлга киритишди.

"Миллий" стадион ҳудудидаги майдонда бўлиб ўтган финал ўйинида "Пахтакор" "Odil Junior"га қарши баҳс олиб борди. Ўйиннинг асосий вақтида ҳисоб очилмади. Шундан сўнг мусобақа регламентига кўра пенальтилар сериясига навбат етиб келди. Бунда омад ёш "пахтакорчилар" томонида бўлиб, улар 3:2 ҳисобида ғалаба қозонишди.

3-ўрин учун кечган баҳсда эса БЎСМ-16 "Локомотив" тарбияланувчиларини 2:1 ҳисобида мағлуб этди. Мусобақа якунига етгач, ғолиб ва совриндорларни тақдирлаш маросими ўтказилди. Бунда турнир бош ҳомийлари "ChaCha" ва "Tudor" савдо белгилари томонидан эсдалик совғалар болакайларга топширилди. Шунингдек, ҳар бир чизиқ бўйича энг яхшилар ҳам аниқланди.

"ChaCha Мустақиллик кубоги-2018" мусобақасининг энг яхшилари:

"Энг яхши дарвозабон" - Ботир Султонов ("Odil Junior")
"Энг яхши ҳимоячи" - Салоҳ Турсунов ("Пахтакор")
Энг яхши ярим ҳимоячи - Шуҳрат Абдухалилов ("Локомотив")
Энг яхши ҳужумчи - Мирмақсуд Мирусмонов (БЎСМ-16)
"Мусобақанинг энг яхши футболчиси" - Даниль Панфёров ("Odil Junior")

Шунингдек, финал учрашувининг "Энг яхши футболчиси" деб "Пахтакор" дарвозабони Диёр Тўлаганов топилди.