"Бунёдкор" яна шарманда бўлди. Нега?

Шундан кейин мазкур клубларнинг U-21 жамоалари ўртасидаги учрашувга қизиқиш ортди (энг камида менда). Чунки "Бунёдкор" академияси тарбияланувчилари олимпиячилардан алам олиш учун майдонга тушиши керак эди...

Бугунга қадар U-21 биринчилигида Абдуҳамид Қодиров шогирдлари ҳар жабҳада пешқадамлик қилаётган эди. Мен улардан кўпроғини кутганим учун стадионга бордим. Лекин ўйин протоколи чиқиши билан шу кўринишдаги сценарийни (5:0) тахмин қилган эдим. 

Боиси шундаки, бугун "қалдирғочлар" таркибидаги асосий ижрочилар учрашувда иштирок эта олишмади. Гап қанот вингерлари Умид Султонов ҳамда Музаффар Олимжонов ҳақида кетяпти. Ўйинда уларнинг ўрни яққол билиниб, "Бунёдкор"нинг қанотлари деярли ишламади.

Футболчиларнинг иккиси ҳам соппа-соғ. Унда нега бугун қайдномага киритилишмади?

Бу саволга жавобни "Олимпик"дан умумий 10 та голни "қучоқлаган" клуб раҳбарияти топишига ишонганимиз туфайли ўз фаразимизни келтириш билан кифояланамиз (уларга ёрдам бўлиши учун). 

Бизнингча, Умид ва Музаффарнинг Ёшлар лигасида майдонга тушишини асосий жамоа бош мураббийи Шуҳрат Мақсудов истамаган. Худди ўтган йил охирида "Пахтакор" билан бронза медали учун бўлган ўйиндаги каби.

Албатта, мураббий иккала футболчи кеча Суперлигада 17 дақиқа ўйнагани учун уларга дам беришни маъқул топган бўлиши мумкин. Аммо қарши тарафдаги Тимур Кападзе Суперлигада 41 дақиқа ўйнаган Даврон Анваров (69) ҳамда 31 дақиқа ҳаракатланган Пўлатхўжа Холдорхоновга бугун ҳам (78 дақиқа) имконият тақдим қилди. Ва улар ҳар 2 ўйинда рақиб дарвозасига биттадан тўп киритишди. Мураббийнинг ҳақиқий даражаси шундай лаҳзаларда сезилса керак...

P.s. Бир мутахассис менга киши кўнглининг оқ бўлиши ҳақида гапирган эди. Ўйлаб-ўйлаб шунақа одам топдим. АГМК бош мураббийи Миржалол Қосимов ўтган йилги мавсумда медалларсиз қолган бўлсада, U-21 жамоаси устози Аъзам Шерғозиевнинг фаолиятига ҳалақит бермади. Шунинг учун ҳам "кончилар"нинг "дубл"и мавсум якунида чемпион бўлди. Шунинг учун ҳам Миржалол акани барча тан олади. Шундай ҳислатлари туфайли уни ҳурмат қилишади. У ҳаммадан душман ясаб олмайдиган даражада катта шахс. Минг афсуски, Қосимовдай бўлиш учун унга ўхшаб бақиришнинг ўзи камлик қиларкан...

Муаллифнинг бошқа фикрларини кузатиш учун телеграм-каналга аъзо бўлишни унутманг.