Кеча Берлиндаги "Герта" - "Боруссия" (1:1) учрашуви орқали 19-турга старт берилганди. Бугун турнинг қолган олтита ўйини бўлиб ўтади.
Энг эътиборга молиқ баҳс "Хоффенхайм" ҳамда "Байер" жамоалари ўртасида кечади. Турнир жадвалида деярли ёнма-ён кетаётган бу икки жамоалар фақат 3 очко илинжида майдонга тушишади.
Юлиан Нагельсманн ва Хайко Херлихх тўқнашувида кимнинг қўли баланд келади, деган саволга "Вирсол Реин-Некар Арена"да ўтадиган учрашув орқали жавоб оламиз.
Турнир жадвалида 2-ўринда кетаётган "Лейпциг" бугун "Фрайбург" меҳмонига айланади. Ральф Хаззенхюттль бошқарувидаги "бўқалар" ўтган турларда жуда муҳим очколарни қўлдан бой беришганди. Уларнинг бахтига кеча "Боруссия" Дортмунд Берлинда очко йўқотди. Бу дегани, агарда улар бугун ғалаба қозонгудек бўлишса, унда "буқалар" турнир жадвалида энг яқин таъқибчилари бири саналган "Боруссия"ни 4 очкога ортда қолдиришади. Аксинча, "Лейпциг" ғалаба қозона олмаса ёки мағлубиятга учраса, унда "Шальке"ни олдинга ўтказиб юбориш эҳтимоли мавжуд. Шунингдек, "Байер" жамоаси очко бўйича "Лейпциг"га етиб олиш имкониятига эга бўлади.
Мёнхенгладбахнинг "Боруссия" жамоаси эса "Аугсбург" билан куч синашади. Дитер Хеккинг ва Мануель Баум ўртасидаги дуэлда ким ғолиб бўлишини "Боруссия Парк"даги тўқнашув ҳал қилади.
Марио Гомес билан ўз таркибини қуроллантириб олган "Штутгарт" "Майнц"га сафар уюштиради. Ўз уйида енгилмас саналадиган "Штутгарт" жорий мавсумда меҳмондаги ўйинларда муваффақият қозона олмаяпти. Бу сафар ҳам эски тарих такрорланадими ёки Ханнес Волф шогридлари ношух серияга барҳам беришадими?
Иккинчи даврадаги илк баҳсда Дортмунддан муҳим 1 очко билан қайтган "бўрилар" бу сафар ўз уйларида "Айнтрахт" билан тўқнаш келишади.
Турнир жадвалининг пастки ўринларидаги аутсайдер баҳсида эса "Гамбург" "Кёльн"ни синовдан ўтказади.
