Бугун Испанияда чемпион номи маълум бўлади

Европа топ-5 чемпионатларининг барчасида янги чемпионлар номи аниқ бўлиб улгурди. Испанияда барчаси сўнгги турда ҳал бўлади.

Чемпионлик учун икки клуб "Реал" ва "Барселона" клублари даъвогарлик қилишмоқда. Ўтган турда мағлуб бўлган "Атлетико" курашдан чиқиб кетди.

Сўнгги турдан олдин "Барселона" 88 очкога эга. Иккинчи ўриндаги "Реал" ҳисобида 87 очко мавжуд. Каталония клуби "Гранада" меҳмони бўлса, мадридликлар Ла-Коруньяда "Депортиво" билан куч синашишади.

"Барселона" ғалаба қозонса чемпион бўлади. Агар Луис Энрике шогирдлари очко йўқотса ва "Реал" ғолиб бўлса Мадрид клуби чемпионликка эришади.

Маълумот учун, "Барселона" Испаниянинг амалдаги чемпиони ҳисобланади. Клуб ҳисобида 23та чемпионлик унвони бор. "Реал" эса 32 марта мамлакатда чемпион бўлган ва бу борада мутлоқ рекордчи ҳисобланади. Мадрид клуби сўнгги бор 2012 йилда Испанияда тенгсиз бўлган.

Бугун чемпионлик учун курашаётган бу икки жамоа иштирокидаги баҳс Тошкент вақти билан соат 20:00да старт олади.

Испания чемпионати. Мусобақа жадвали