Бугун футбол. "Бунёдкор" - "Олмалиқ"

Бугун кун тартибидан битта ўйин ўрин олган ва бунда "Бунёдкор" Виктор Кумиков бошчилигидаги "Олмалиқ"ни қабул қилади. Ўйин 19:30да бошланади. 

Олий лига. 17-тур. 11 август

«Бунёдкор» (Тошкент) – «Олмалиқ» (Олмалиқ)

Ҳакамлар: И. Танташев (Бухоро), Ҳ. Шодмонов (Бухоро), А. Қўлдошев (Бухоро), Р. Абдувоҳидов (Қарши)

Назоратчи: С. Эрматов (Тошкент).

ПФЛ вакили: Ф. Магаметов.

Турнир жадвалидаги ўрни: "Бунёдкор" 8-ўринда (22 очко), "Олмалиқ" 4-ўринда (25 очко). 

Жамоаларни атиги уч очко жаратиб турибди ва "Бунёдкор" ғалаба қозонадиган бўлса, ўз ҳисобидаги очколарни "Олмалиқ"никига тенглаштириб олади. 

Бугун "Бунёдкор" стадионида қизиқарли баҳс кечиши кутилмоқда, негаки аввалги турда иккала жамоа ҳам дуранг ўйнади. "Бунёдкор" сафарда "Сўғдиёна" билан 0:0 ҳисобида дуранг қайд этган бўлса, "Олмалиқ" ўз уйида "Бухоро"ни енга олмади - 1:1. 

Факт: Миржалол Қосимов клубга қайтганидан бери "Бунёдкор" ўз майдонида мағлуб бўлмади. Жамоа "Қўқон-1912", "Локомотив" ва "Насаф"ни мағлуб этган бўлса, "Пахтакор" билан дуранг ўйнади. 

Биласизми? "Олмалиқ" сафар ўйинларида ҳозирча 9 очкони қўлга киритган. Кумиков жамоаси иккита ўйинда ғалаба қозониб, уч марта дуранг ўйнаган ва яна учта учрашувда ютқазиб қўйган. Тўплар нисбати 6-11. "Олмалиқ" сафар баҳсларида чемпионатнинг бошида "Бухоро", "Сўғдиёна" ва "Локомотив"га имкониятни бой берган. 

Факт: "Олмалиқ" олий лигада 5-турдан бошлаб кетма-кет 12 ўйинда ютқазмай келмоқда: олти ғалаба, олти дуранг. 

Эслатиб ўтамиз, Олмалиқ шаҳрида кечган биринчи давра учрашувида 0:0 ҳисоби қайд этилган. Ўтган йил Тошкентда бўлиб ўтган баҳсда эса "Бунёдкор" ўз рақибини 4:2 ҳисобида мағлуб этган. 

Х.Холиқов