Бизни алдаган "етти". Алексиснинг МЮда ўрни йўқ

"Манчестер Юнайтед" Генрих Мхитарянни Алексис Санчес билан алмаштирганида, кўпчилик чилилик футболчини янги жамоасида ўйнаб кета олишини кутганди. У "Арсенал" таркибида асосан чап қанотда ҳаракат қиларди, Моуриньо ҳам уни айнан ўша позицияда ўйнатмоқда.

Алексис МЮга ўтганидан кейин жамоада бирданига икки муаммо пайдо бўлди. Биринчидан, Поль Погбада ўзини тутиши ва тактик томондан бетартиб ўйнаши кузатила бошланди. Санчес ўйин давомида Погбанинг жойида ҳам ўйнамоқда. Айнан Санчеснинг трансферидан кейин франциялик ва Жозенинг ўртасида келишмовчиликлар юзага келди: Погба асосий таркибдаги жойини йўқотди, унинг ўрнида Скотт Мактоминей ўйнамоқда.

Иккинчидан, "Юнайтед"да чап қанот ҳужумида бирорта муаммо йўқ эди. Маркус Рэшфорд ва Антони Марсьяль бу позицияда катта рақобат олиб боришарди. Айнан шу икки футболчи орқали "Юнайтед" рақибига катта босим уюштирарди: агарда асосийда Рэшфорд ўйнайдиган бўлса, у рақибларини чарчатарди ва ўрнини Марсьялга бўшатиб берарди. Шу схема тескарисига ҳам ишлатиларди.

Ўнг қанот вингери масаласи эса неча йиллардан буён ҳар доим очиқлигича турибди. Ван Гал даврида бу жойда Хуан Мата тўп сурарди, унинг тезлиги ва гавдаси бўлмаганлиги учун марказда ўйнашга кучи етмасди. Ёзда Моуриньо ўнг қанот учун ҳеч кимни харид қилмади ва ёши каттароқ ҳимоячи Антонио Валенсияни ҳам ҳимоя ҳам ярим ҳимояда югуртирмоқда. Шу боисдан ҳам орқа чизиқда айрим муаммолар юзага келмоқда.

Сўнгги учрашувларда Жозе қанотлардаги номақбулликни йўқотишга эришди ҳисоб. Алексис ва Рэшфорд чап қанотда ўйнамоқда, Марсьяль эса ўзи учун бироз ноқулайлик қилаётган ўнг томонда ҳаракатланмоқда. Вазиятга қараб учрашув давомида позициялар ўзгариб турибди. Бундан келиб чиқмоқдаки, бир футболчининг орқасидан жамоадаги барча тактик схемалар ўзгариб кетди.

Тўғри, агарда Алексис чап қанотда шиддат билан ўйнаб, ёриб киришни уддалаганида бемалол бошқа футболчиларга голлар киритиш учун имконият яратиб берган бўларди. Чилилик футболчи ўзининг энг яхши жисмоний ҳолатида бўлса, дунёнинг энг яхшиларидан бирига айланади, унинг пушка каби зарбасини қайтаришнинг ва ўзини йиқитмасдан тўхтатишнинг иложи йўқ.

"Юнайтед"да Алексиснинг керакмасга чиқарилган версияси (талқини) ўйнаётгандек туюлмоқда. У тўпни йўқотиш, рақибларни алдаб ўта олмаслик, тўпни шерикларига етказиб беролмасликда "етакчи" бўлиб турибди. Ўйин вақтидаги фойдали иш коеффициенти ҳам жуда паст, худди рақиблари учун ўйнаётгандек кўринмоқда.

Балким чилиликнинг ўзи ҳам "Юнайтед"да ўйинлари унчалик ўхшамаётганини сезаётгандир. Моуриньо учун Алексисни олдинги жисмоний ҳолатига қайтаришнинг бир йўли шундаки, уни захирада ушлаб туриш, шу орқали ундаги босимни бироз камайтириб, яна ўйинга чанқоқ қилиб асосий таркибга қайтарса бўлади. Ўшанда Алексис биринчи даврадаги каби сермаҳсулликни намойиш эта олиши мумкин. Жозе эса Санчесни кейинги мавсумда ўзини кўрсатишига ишонмоқда.

Агарда Жозе Алексисни чап қанотда ўйнатаверса, "Юнайтед"нинг бу мавсумдаги ишлари юришмаслиги катта эхтимол. Ўнгда Марсьяль ўйнайверсин, Мата эса ўйинга жуда яхши киришиб кета олади, кенг кўламли ишни бажаради ва захирага қайтади, унинг вазифаси шундай. Статистика ҳақиқатни сўзлайди: агарда Мата асосий таркибда ўйнаса, "Юнайтед" ғалабага эришмоқда, усиз - очко йўқотмоқда.

Алексис ва Погба борасидаги қийинчиликлар Моуриньо жамоасида муаммолар келтириб чиқараётгани аниқ: молиявий томондан ҳам ва бошқа томонлардан ҳам. "Юнайтед"да пул кўп бўлса ҳам, кўплаб юлдузларни олиб келиб, уларга маош тўлаш жуда қийин. Янги футболчи шундай бўлиши керакки, у "Юнайтед"нинг механизмига ҳар доим ижобий таъсир ўтказсин ва энг яхши тарафларини кўрсата олсин.

"Брайтон"га қарши баҳсдан кейин Жозе футболчиларида қандайдир кўплигини айтиб, шогирдларини қаттиқ танқид остига олди. Бу ўйинда Погба ва Алексис захирада қолди, шундай бўлган тақдирда ҳам жамоада муаммолар ярқ этиб кўзга ташланди. Бир футболчи марказда прессинг уюштирмаса, паснинг орқасидан худди кучук каби югуриб юрибди. Бу эса жамоанинг ўйинни қуришида халақит қилаётганди.

Жамоадаги ўйин асосий ижрочилар Погба ва Санчеснинг атрофида яратишга ҳаракат қилинмоқда. Улар - юлдузлар, ҳар доим жамоани олдинга бошлашга интилишади, рақибнинг зич отряди олдида тиз чўкишга хаққи йўқ. Бундан бир неча йиллар олдин Ферги қўл остидаги "Манчестер Юнайтед"да Хуан Себастьян Верон, Шинжи Кагава каби футболчилар бор эди, улар ҳам майдонда ўз жойини топа олмади ва жамоани тарк этди. Кейинчалик, Ван Гал даврида Анхель Ди Мария ҳам шу ҳолатга тушиб қолди. 

Ишлар юқори даражада эмас, мухлислар ва матбуотнинг босими плеймейкерларнинг сифатларини ёпиб қўяди, агарда футболчиларга алоҳида функциялар ва позицияларга ажратилиб, уларга конкрет вазифалар берилса, улар креативликни намойиш этишлари мумкин. Бунинг учун балансни ушлаб туриб, майдондаги ҳар бир футболчига алоҳида роль берилиши керак. Айни дамда Моуриньо жамоасида бу йўқдек кўринмоқда.

"Манчестер Юнайтед" яна кучли жамоага айлана олмаяпти. Жамоа топ-юлдузларни трансфер қилишга қодир, бироқ уларни ишлатишни ҳам билиш керак. Матич ва Мактоминей каби классик таянч ярим ҳимоячилари айни дамда барқарор, улар Погба ва Санчесдан ёрқинроқ ва тактик томондан тартиблироқ ҳаракат қилишмоқда. Барчаси оддий - Неманья ва Скотт позицияни тўғри танламоқда, жамоанинг жойлашувини яхши ҳис қилмоқда ва шериклари билан чиройли ўйнамоқда.

Санчесда ҳам Погбада ҳам Манчестерда ўзини кўрсатиш учун имкониятлар етарлича, бироқ ҳозирча улар мураббийнинг айтганини қилишлари керак, финтларни ишлатиш ҳозирча шарт эмас. Агарда "Манчестер Юнайтед" юлдузлари ўзлари учун ўйин намойиш этаверишар экан, жамоа совринлардан умид қилмаса ҳам бўлаверади.

Миржалол Норматов таржима қилди