Биринчи лигада ҳам дарвозабонлар муаммоси ёхуд...

Бундан бир неча соат олдин Тошкентнинг "Истиқлол" жамоасида дарвозабонлар борасида муаммо юзага келгани ҳақида айтиб ўтгандик. Тошкентликларнинг ҳар иккала посбони ҳам дисквалификация туфайли бугунги ўйинда жамоасига ёрдам бера олмайди. Шу боис бугун "Спартак"ка қарши баҳсга мураббийлар ҳужумчи Жамолиддин Нормирзаевни пухта тайёрлашга ҳаракат қилган. Шу боис Нормирзаев учрашувни дарвозабон сифатида бошлади.

Косоннинг "Аланга" жамоасида ҳам дарвозабонлар бўйича муаммо юзага келган. Боиси бу жамоа "Қўқон"га атига битта дарвозабон билан ташриф буюрган. Хабарингиз бўлса керак, ушбу жамоанинг умидли посбони Ғанишер Холмуродов ҳарбий хизматга кетишини айтганди. Воқеалар ривожи дарвозабон айтганидек бўлиб чиққан ва Холмуродов айни дамда жамоада эмас. "Аланга"нинг бошқа бир посбони Шерзод Абдураимовнинг U-19 ёшлар терма жамоамиз билан сафарга кетгани боис, ҳозир мураббийлар ихтиёрида биргина голкипер Жавоҳир Илёсов қолган. Шу боис жамоа таваккал йўл тутиб, биргина дарвозабон билан Қўқон томон сафарга чиққан. "Қўқон-1912" - "Аланга" баҳсидаги футболчилар рўйхатига эътибор қаратар эканмиз. Косонликлар захирасида дарвозабон йўқлигини кўриш мумкин. Агарда бугунги баҳсда, асосий посбон Илёсов жарохат олгудек бўлиб қолса, у холда "Аланга" ҳам ҳудди "Истиқлол" каби бошқа чизиқ футболчиларини дарвозага қўйишга мажбур бўлади.

Кўриб турганингиздек, дарвозабонлар муаммоси фақатгина миллий терма жамоада эмас, биринчи лига клубларида ҳам бор. Муаммони аввало қуйидан бартараф этмоқ лозим.