“Бир футболчи тарихи”. Балотеллини ўзига кумир деб ҳисоблайдиган Мойзе Кин ҳақида

Одатда бу мамлакат ҳақида гапирганимизда кучли ҳимоя чизиғи, юлдуз футболчилар ёдимизга келаверади. Нафақат футболчилар, балки ўша макондаги футбол чемпионати, у ердаги гранд ҳамда ўтмишдаги гранд жамоаларнинг ҳозирги ҳолати инсонни А Серия ўйинларига қизиқтираверади. Дел Пьеро, Балотелли, Лука Тони каби ҳужумчилар бўлган ва бугунги кунда ҳам янги авлод вакиллари ўсиб бормоқдалар. 2019 йилнинг бошида “Ювентус” сафида ёш иқтидор порлаб чиқди, ўйинларда ўзини кўрсата олди ва ўша даврда таркибида потугалиялик суперюлдуз Криштиану Роналду бўлса ҳам марказий ҳужум чизиғида бироқ қийналиб қолган туринликлар айнан шу ҳужумчини кашф қилишди. Бу – Мойзе Кин. Бугун ушбу футболчи билан танишамиз.

Мойзе Кин – ким ўзи у?

Миллати иваур бўлган италиялик Мойзе Кин 2000 йилнинг 28 февралида Пьемонт провинциясининг Верчелли шаҳрида дунёга келди. Ота онаси аслида Кот-д'Ивуар фуқаролари. Онаси мамлакатидаги урушдан қочиб келган бўлса, отаси яхши ҳаёт илинжида Италияга қадам қўйган.  

Клублардаги фаолияти ҳақида

Кин дастлабки футбол сирларини “Торино” ҳамда “Ювентус” жамоаларида ўрганди. Профессинол футболга бошқаларга қараганда жуда эрта кириб келди дейилса шак-шубҳа бўлмайди. 2016/17 йилги мавсумда “Ювентус”нинг асосий жамоаси билан биргаликда машғулотларда иштирок этишни бошлади. Италия чемпионатидаги дебютини эса 2016 йилнинг ноябрь ойида нишонлади. “Пескара” жамоасига қарши ўйинда “Ювентус” сафидаги илк ўйинини ўтказди. Айнан ўша йили ноябр ойининг 22 чисида ЕЧЛда ҳам дебют қилишга эришди. Айнан ушбу иштироки билан футболчи 2000 йилда туғилган чарм тўп усталари орасида Чемпионлар лигасида ўйнаган илк ўйинчига айланди. 

У нафақат 2000 йиллар орасида ЕЧЛдаги дебюти билан, балки Европа миллий чемпионатларида гол урган илк футболчига ҳам айланди. 2017 йилнинг май ойида, А Сериянинг сўнгги баҳсида Кинга имконият берилди. Захирадан майдонга туширилган футболчи ўйиннинг 90+4 дақиқасида рақиб дарвозасини ишғол қилди ва юқорида келтирган статистика бўйича ҳам биринчи футболчига айланди. “Бу голни меҳрибон онажоним ва оиламга бағишлайман. Гарчи у менинг гол урганимга ишонмаслигини билсам ҳам” – деган эди Мойзе айнан ўша ўйиндан сўнг.

Кейинги мавсумда эса Мойзе Кин “Верона” жамоасига ижарага бериб юборилди. “Менда ёшлигимдан ғолиблик менталитети шаклланди. Бу “Ювентус” тизимида шуғулланган бола учун оддий ҳол - бошқача бўлиши мумкин ҳам эмас. Умидворманки, янги клубда барчасини исботлайман, жамоадошларимга ўрнак бўламан. Туринда ўрганганларимни амалда кўрсата олсам, бас. Ҳа, ҳозир атиги 17 ёшдаман ва ҳали ўйинимнинг кўплаб жиҳатларини сезиларли даражада яхшилашим зарур. Шахсим ҳақидаги гап-сўзлар ўз йўлига. Мисол учун, мақтовларга чалғимай, ҳар кунлик машғулотларга жиддий ёндашишим ва қаттиқ тер тўкишим зарур. Йўқса, асосий таркибдан жой олишим даргумон” – деган сўзларни айтган эди Мойзе айнан ўша вақтда. Ушбу жамоада кўпроқ ўйин амалиётига эга бўлган ҳужумчи 2017/18 йилги мавсумда А Серияда 19 ўйин ўтказди ҳамда 4 маротаба тўп киритишга муваффақ бўлди. “Верона”нинг Б Сериясига тушиб кетиш эса уни яна Туринга қайтишга ундади…

2018 йилнинг ёзида “Ювентус”га қайтган Кин ўзини кўрсата олди ҳамда бутун мавсумда 13 ўйинда иштирок этиб, рақиблар дарвозасига 6 бор йўл топа олди. Самарадорлик жиҳатдан ўтган йилларга қараганда анча яхши эди. “Юве” Кинга катта мактаб бўлса олди. Онаси интервюлардан бирида: “Барчамиз “Ювентус” раҳбарларидан бағоят миннатдормиз. Улар ўғлимга доимо умид билан қарашади, алоҳида руҳлантириб келишади. Мана, бугун Мойзега имконият тақдим этиб, адашишмади. Асосий факт шуки, ўғлим шу ерда улғайди, таълим олди, оёққа турмоқда. Бунинг учун “Ювентус”га фақат ва фақат чуқур ташаккур изҳор қиламан. Бинобарин, Мойзенинг ҳозирги даражага етишида клубдагилар кўп ишлашганини яхши биламан. Ахир ҳеч ким ўзича профессионал бўлиб қолмайди-ку” – дея таъкидлаган эди.

2019 йил ёз фаслида эса Кинга жуда ҳам кўп таклифлар туша бошлади. Ёш ҳужумчини ўз сафида кўрмоқчи бўлган жамоалар кўп эди, Мойзе эса таклифлар орасидан “Эвертон”ни танлади ҳамда ливерпулликлар билан 5 йиллик шартномага имзо чекди. Трансфер суммаси эса оз эмас, кўп эмас 27,5 миллион еврони ташкил этди. Бироқ ушбу мавсум Кин учун ҳам, унинг персонал мухлислари учун ҳам кутилганидек бўлмади. Шундай бўлса-да, АПЛда 29 ўйинда иштирок этди, бор йўғи 2 гол урди. Ливерпулликлар эса мавсум сўнггида Кинни ижарага беришга қарор қилишди. Мойзе эса 2020/21 йилги мавсумни эса ПСЖ сафида ўтказишни маъқул кўрди. Кинда “Ювентус”га қайтиш учун ҳам имкон бўлган, лекин унинг ўзи хоҳламаган эди. "Бу ҳақиқат, "Ювентус"га қайтишим ҳам мумкин эди. Бироқ оилам билан биргаликда Лига 1 да ўйнаш борасида қарорга келдик. Парижда кўп бўлганман, бу ерда қариндошларим яшайди. Бундан фантастик даражада тажриба олишга умид қиламан. Ёшман, топ-форвардлар билан бирга ўйнаш менга ёқади. Улардан нималарнидир ўрганиб, мен ҳам юқори марраларга эришишим мумкин" – дея айтган Мойзе Кин. 

Кин ўзига кумир сифатида кимни кўришини биласизми? “Марио Балотеллини асосий кумирим сифатида кўрсатаман. Унинг ўйинига ҳавасим баланд, айниқса. Аслида Марио олижаноб йигит, дейлик, менга ҳамиша керакли маслаҳатлар бериб туради. Айтишича, у менинг ўзи тушган ҳолатларга йўлиқмаслигимни истайди. Ҳақиқий дўст!” – деб айтган эди Кин ўзининг интервюларида. 

Терма жамоадаги фаолияти ҳақида

Мойзе дастлаб Италиянинг ёшлар терма жамоасида ўйнади. 2016 йилда U-17 жамоаси билан биргаликда Европа чемпионатида иштирок этиб, 2 ўйинда 1 марта гол урди. Орадан икки йил ўтиб Италия терма жамоаси бош мураббийи Роберто Манчини томонидан асосий терма жамоага чақирув олди ва 18 ёшида терма жамоадаги дебютини нишонлади. Дастлабки ўйинини АҚШга қарши ўртоқлик учрашувида ўтказди. Дебют голини эса орадан бир йил ўтгач Европа чемпионати саралашида Финляндия термаси дарвозасига урди. 

Мино Райоланинг мижози

Мойзе Киннинг агенти Мино Райола. Сиз бу инсон ҳақида эшитиб улгургандирсиз. Ибрагимович, Погба, Мхитарян, Лукаку, Доннарумма, Верратти ва Балотелли каби футболчилар бирга ишлайдиган агент, “Юве”даги иқтидор билан ҳам ҳамкорлик қилиш учун келишувга эришган.

Шахсий ҳаёти

Ижтимоий тармоқларда доим ҳам фаол бўлмайдиган италияликнинг Инстаграм тармоғига назар ташласак, у ерда майдондагидан ташқари асосан яқинлари билан биргаликда дам олиш вақтида тушган суратларини кўриш мумкин.

Футболчи ҳақидa узундан-узоқ гапириш мумкин. Яхшиси, унинг ҳақиқий ҳаракатлари, фаолиятини майдонда кўрганимиз маъқул. Биз сизга унинг тарихи ҳақида сўзладик, олдинда турган жараёнларни эса бизга бугунги кунда миллионлар ўйинидан, миллиардлар ўйини айланган футбол ва унинг ичидаги ўйинлар жавоб бериши мумкин. Ҳали биз бу футболчига қайтамиз ҳамда фаолият бу мақоладан кейинги фаолият тарзини сўзлаб берамиз. 

Оғабек Самисов тайёрлади