Бахтиёр Ашурматов: "Андижон"ни аутсайдер жамоа деб аташларига чек қўймоқчимиз"

Биз кеча жамоанинг машғулотини кузатиб бордик ва Ашурматовга ўзимизни қизиқтирган саволлар билан мурожаат қилдик.

- "Андижон" варианти қандай пайдо бўлди?
- Мен жамоа вице-президенти Маъруф Абдусаломов томонидан таклиф бўлди ва "Андижон"га келдим. Вилоят ҳокими билан учрашувдан сўнг бош мураббий бўлишга розилик бердим. Сўнгги йилларда "Андижон" аутсайдерлар орасига тушиб қолди бунга чек қўйиш фурсати келди. Раҳбарият ва менинг мақсадим яхши жамоа шакллантирш ва мухлисларга ёқадиган ўйин кўрсатиш орқали ижобий натижаларга эришиш. 

- Янги мавсум бошланишига бир ой вақт қолди. Барчасига улгурасизми?
- тўғри олий лига бошланишига деярли бир ой вақт қолди. Бошқа жамоалар декабрь ойида қилган ишни биз февраль ойида қилишга мажбурмиз. Янги футболчиларни кўрикдан ўтказиш, ўйинчиларни жисмоний ҳолатини тиклаш, жамоани шакллантириш ва ўйинлар ўтказиш... Мана шуларнинг барчасини қисқа вақт ичида қилишимиз шарт. Сабаби мавсум бошланганда вақт кам эди, улгурмадик каби баҳоналар ўтмайди. Андижонлик мухлислар жуда талабчан. Шу боис ҳар бир дақиқадан унумли фойдаланишга ҳаракат қиламиз.  

- "Қизилқум"да иш бошлаган эдингиз...
- дастлаб "Қизилқум"да асосан клубнинг Тошкентдаги ишларини қилмоқчи эдим. Бўш вақтимда чет эл клубида тажрибамни оширмоқчи эдим. Ҳаким Актамов мени мураббийлар штабида кўришни истаётганини маълум қилди. Навоий уйимга узоқлик қилди, бу орада "Андижон"дан таклиф тушди. Шу боис Ҳамид Ғуломович мени тўғри тушунди ва ҳеч қандай хафагарчиликсиз хайрлашдик. Улар менга янги иш жойида омад тилашди. 

- Мураббийлар штабида кимлар ишлашади?
- Менга Шуҳрат мақсудов, Зоҳид Нурматов ва Камол Жўнашев каби мураббийлар ёрдам бериб боришади.

- Жамоага қайси футболчиларни таклиф этмоқчисиз?
- Айни пайтда деярли барча юқори савиядаги футболчилар клублар билан шартнома тузиб бўлишган ёки келишувга эришиб бўлишган. Шу боис яхши футболчини топиш жуда қийин кечади. Айтганимдек вақт оз қолди. Ҳозирча бир қатор номзодлар бор, бироқ улар билан келишувга эриша олганимиздан сўнг маълумот берганим маъқул. Ҳозирча янгилардан Бобур Акбаров янги мавсумни "Андижон"да ўтказиши аниқ бўлиб улгурди. 

Нарзулла Сайдуллаев суҳбатлашди