"Барса" Хименеснинг трансферини кафолатлаш учун 2019 йилда "Атлетико"га 15 млн евро тўлаган. Трансфер каталонияликларнинг молиявий муаммолари сабаб амалга ошмади

Каталонияликлар сешанба куни собиқ президент Жозеп Бартомеунинг ишларидан сўнг клубнинг молиявий ҳолати таҳлилини тақдим этишди. Унда бир қизиқ жиҳат маълум бўлди, "кўк-анорранглилар" 2019 йилда "Атлетико"га 15 миллион евро тўлашган.

Бу маблағ ҳимоячи Хосе Хименеснинг трансфери учун ўзига хос аванс бўлган.

"Барса" 2019 йилда ҳимоячи Маттейс де Лигт билан шартнома имзоламоқчи эди, аммо агент Мино Райоланинг 20 млн евролик комиссияси сабаб буни рад этганди.

Шундан сўнг клуб Хименесга эътиборини қаратди. Аммо, "Барса" 2019 йилда форвард Антуан Гризманн учун "Атлетико"га 120 млн евро тўлади ва икки битимни бирга амалга ошира олмади.

Шу сабаб "Барселона" Мадрид клубига келажакда Хименеснинг трансферини кафолатлаш учун 15 млн евро тўлади. Битимда шунингдек Хосе жароҳат олса, ўрнига бошқа ўйинчи билан шартнома имзолаш белгилаб қўйилди.

Трансфер коронавирус сабаб келиб чиққан "Барселона"нинг молиявий қийинчиликлари туфайли амалга ошмади.