Баҳриддин Ваҳобов: «Обод»га қарши ўйиндан олдин барчада кайфият юқори ва жангавор холатдамиз»

- Ҳадемай олий лигада навбатдаги тур ўйинлари бошланади. Жамоамиз бу гал Тошкентда ўйнайди. Бўлажак учрашув тайёргарлик қандай бўлмоқда?

 - Шанба куни «Обод» билан ўйнаймиз. Рақиб жамоани хурмат қиламиз доим. Шунинг учун куни-кеча пойтахтда йиғилдик ва тайёргарликка зўр берганмиз.

- Биринчи даврада «Бухоро» ушбу рақибига ўз уйида имкониятни бой берганди. Балки реванш олиш пайти келгандир?

- Биринчи даврада нафақат ушбу жамоага мағлуб бўлганмиз, балки биргина «Обод» дарвозасига тўп ҳам кирита олмаган эканмиз. Биласизми, «Обод» жамоаси айни дамда турнир  жадвалидда энг сўнгги поғонани банд этиб турган бўлсада, жамоа кетма-кет омадсиз ўйинлардан кейин бизга қарши худди яраланган шер каби турибди, дейиш мумкин. Менимча ҳар қандай жамоа ўз майдонида фақат ютуқ учун чиқади. Лекин биз ҳам эртанги ўйинда осонликча таслим бўлмаймиз. Ортимиздан таъқиб этиб келаётган жамоалар билан очколар фарқи деярли тенг. Уларни ўзимиздан ўтказиб юбормаслигимиз керак.

- Сиздан ҳам мухлислар анча вақтдан бери гол кутишмоқда...

- Ҳа, тўғри айтасиз. Охирги марта биринчи давранинг сўнгги турида «Сўғдиёна» дарвозасига тўп киритгандим. Насиб қилса «Обод» билан ўйинда гол уришга харакат қиламан. Лекин мен учун асосийси жамоамнинг ғалабасидир.

«Бухоро» матбуот хизмати.