Асрор Алиқулов: “Йирик ҳисобда ғалаба қозонган бўлсакда, ўйинимизда камчиликлар йўқ эмас”

Учрашувдан сўнг ғузорликлар устози Асрор Алиқуловнинг фикрлари билан қизиқдик.

-  Аввало чемпионатни ғалаба билан бошлаганимиз ва бу орқали Ғузор халқига хурсандчилик улашганимиздан хурсандман. Мавсумнинг илк расмий ўйини бўлгани учун ҳам йигитларда бирмунча ҳаяжон бўлгани сезилиб турди. Қишки йиғинлар чоғида синов-назорат ўйинларини етарлича ташкил эта олмаганимиз ҳам бугунги ўйинда билинди. Ҳисобни биринчи бўлиб очганимиздан сўнг рақиб жамоа тенглаштиришга эришди. Шундан кейин жамоамиз ўйинида бироз пала-партишлик юзага келди. Йигитлар ғалаба илинжида харакат қилди. Уларда ғалабага бўлган ишонч бор эди. Худога шукур, кейинчалик кетма-кет голлар киритиб ижобий натижа қайд эта олдик.Аниқ эслай олмайман, “Шўртан”нинг ўз уйида охирги марта бу каби йирик ҳисобда ғалаба қозонганини. Шу боис  Ғузор халқи йирик ҳисобдаги ғалабани соғиниб қолганди.

-  Бош мураббий сифатида илк расмий учрашувимни ўтказдим. Яширмайман, ўйин олдидан бироз ҳаяжон бўлди. Лекин кейинчалик ҳаммаси ортда қолди. Рақибни хурмат қилган холда шуни айтишим мумкинки, бугун қандай ҳисобда бўлмасин ғалаба қозонишимизга ишонгандим. Чунки биласиз, “Шўртан” ўтган йили элитада иштирок этган. Ўтган мавсумдаги йигитларнинг аксариятини таркибимизда сақлаб қолганмиз. “Хоразм” эса бир неча йиллардан буён асосан қуйи лигада иштирок этиб келмоқда. Агарда ўз ўйинимизни намойиш эта олсак, рақибга ҳеч қандай имконият қолдирмаслигимизни сезгандим. Лекин яна қайтараман, қишки ўқув-йиғин чоғида назорат ўйинларини кам ташкил этганимиз таъсирини ўтказмоқда.

-    Футболчилар ҳақида нима дейишим мумкин? Режага кўра йигитлар берилган кўрсатма бўйича аввалига ўйнай олмади. Кўп вазиятларда совуққонлик етишмади. Бироз шошиб қолди. Айниқса ёшларнинг ҳали тўла тайёр эмаслиги билиниб қолмоқда. ПРО-Лигада иккита ёш футболчини майдонда ўйнаши шартлиги боис, менимча кўп жамоаларда ёшлар ўзларини у қадар кўрсата олмаяпти. Бу борада бошқаларда ҳам муаммо бор назаримда. Лекин ўйиннинг иккинчи таймида ёшларимиз ўзларини кўрсатди. Голларда уларнинг ҳиссаси катта бўлди. Бир сўз билан айтганда футболчилар берилган кўрсатмаларни 50х50 бажарди.

-  Олдин ҳам айтганман, биз кўп нарса йўқотдик. Қишки йиғин чоғида камчиликларни тўлиқ кўриб олмадик. Расмий ўйинлар барини кўрсатиб беради. Энди жамоамиз фақат ўйиндан-ўйинга кучайиши мумкин. Шунинг учун ҳам рақибга қараб тайёргарлик кўриб борамиз. Ўзимизга керакли бўлган ўйинчиларни олиб қолдик. Кейинги ўйинга эртадан яна тайёргарликни бошлаймиз.

Исломбек Рустамбеков суҳбатлашди.