Асрор Алиқулов: "Суперлига жамоалари ҳам "Олимпик" дарвозасини ишғол қилишда қийинчиликка дуч келишмоқда"

- Ўйин ҳақида

- "Олимпик" жамоаси тўпни яхши назорат қилди ва ҳужумдан ҳимояга тез ўтди. Суперлига жамоалари ҳам уларнинг дарвозасини ишғол қилишда қийинчиликка дуч келишмоқда.  Биз шундан келиб чиқиб узун паслар орқали ёки қарши ҳужумда ўйнашга интилдик. Гол урдик, аммо афсуски, ўйин сўнгида ўз дарвозамиздан тўп олиб чиқиб, ғалабани қўлдан чиқардик. Энди кутамиз, балки 3-ўрин орқали гуруҳдан чиқармиз.

- Ҳакам бугун 8 та сариқ карточка кўрсатди. Бу ўйинга хос бўлдими?

- Ҳакамларни назорат қилувчи ташкилот бор. Ўйлайманки, улар хатоларни кўриб чиқишмоқда. Ҳакамлар тўғрисида гапириш тақиқланган. Мухлислардан ҳам кўп эътирозлар бўлди. Ишқибозлар стадионларга қайтишида ҳакамлар ҳам ҳисса қўшиши керак, буни ўйлаб кўришимиз лозим.

- "Олимпик" футболчилари тез-тез йиқилиб тушишди. Жамоадан шунақа ўйинни кутганмидингиз ва уларда бошқа ўйинларда ҳам шундай ҳолатларни кузатганмисиз? 

- Кузатганмиз. Футболчиларининг аксариятида дриблинг яхши, шу боис алдашга киришади. Айрим вазиятларда биз қўполлик қиламиз, баъзи ҳолатларда улар йиқилишади. Бунга кўп ҳам эътибор қаратиш керак эмас.

- "Шўртан" ҳимоявий ўйнагани яхшимиди ёки кўпроқ ҳужум қилгани?

- Ҳужумда ўйнаш хавфли эди, чунки "Олимпик" қарши ҳужумлар орқали жуда кўп голлар урган. Биз ҳимоядан чиқишда тўпни йўқотмасликка ҳаракат қилдик.

-  Ярим ҳимояда ҳаракат қилган Фарҳод Имамовнинг ўйини ҳақида қандай фикрдасиз?

- Имамов жароҳати боис ҳали кўп ҳам ўйнамади. У тез чарчаб қоляпти. Шунинг учун ўтган ўйинда 60 дақиқа ўйнатгандик. Лекин унинг бугунги ўйинидан мамнунмиз.