Асрор Алиқулов: "Ҳомийимиз кимлигини ҳам билмаймиз"

- Про-лига жамоаси бўлсак-да, Суперлига жамоасига қарши муносиб ўйнашга ҳаракат қилдик. Футболчиларимнинг потенциали бор. Рақибга муаммолар туғдириш қийин бўлмади. Бироқ сўнгги дақиқаларга келиб, футболчилар чарчаб қолишди. Захирадан тушганлар ўйинни кучайтира олишмади. Шу сабабли биз вазиятлар яратишга қийналдик, нотўғри пасларимиз кўпайиб кетди.

- Ушбу баҳс орқали Суперлига ва Про-лига ўртасидаги фарқ қандайлиги сезилдими?
- Фарқ жуда катта. Кўрган бўлсангиз, футболчилар яккакурашларда қийналмоқда ва мағлуб бўлмоқда. "Қизилқум" ушбу мавсум Суперлигада муносиб иштирок этмоқда. Легионерларнинг сифати ёмон эмас. Шунинг учун футболчиларнинг маҳоратида фарқ сезилиб қолмоқда. Майдонда уларга қаршилик кўрсатиш Про-лига футболчиларига осон эмас.

- 2010 йили "Шўртан" айнан шу босқичда "Қизилқум"ни мусобақадан чиқариб юборганди. Ўша "Шўртан"ни қайтариш мумкинми?
- Сўнгги 2 йилни "Шўртан" турли хил таъқиқлар остида ўтказмоқда. Клубнинг молиявий ҳолати сабабли машғулотларда ва бошқа жабҳаларда қийинчиликка учраяпмиз. Ҳатто ҳомийимиз кимлигини ҳам билмаймиз. Раҳбарият ҳозирда бу борада иш олиб бормоқда.

- Гуруҳ босқичидаги "Қизилқум" билан ҳозирги "Қизилқум" ўртасида қандай фарқ бор?
- "Қизилқум"нинг сўнгги ўйинларини кузатганимда жамоа футболчилари тўпни ўзида яхши ушлаб тура олишини кўрдим. "Қўқон-1912"га қарши ўйинни кўриб чиқдим. Машғулотлар давомида рақибдан тўпни олиб қўйиш борасида кўп ишладик. Аммо ўйинда буни уддалай олмадик. Футболчиларнинг савиясидаги фарқ катталиги кўринди.

- "Шўртан"нинг мақсади қандай?
- Таъқиқ остида биз ишладик. Барча қарзлар тўланди. Энди биз ёш футболчиларни тарбиялашга ва яхши жамоа тузишга ҳаракат қиламиз.