Асқар Умаров: “Норин” ҳақли равишда ғалаба қозонди”

- Ўтган турда “УзДонгЖу” билан ўйинимиз бекор қилиниб, техник мағлубиятга учрагандик. Албатта бу кейинги учрашувга ўз таъсирини ўтказмасдан қолмади. Бошқача айтганда, зарба кетидан зарба бўлди.

- Ўйинда устунлик жамоамиз томонида бўлди. Гол уриш учун имкониятлар бўлди. Аммо улардан унумли фойдаланиш насиб қилмади. “Норин” футболчилари эса ўйин сўнггида битта имкониятни самарали якунлаб, ғалабани илиб кетди. Табиийки бу каби голдан сўнг уч очкони ўз майдонингда йўқотиш, алам қилади. Нима ҳам дердик, бу – футбол.  

- “УзДонгЖу” билан учрашувда нима учун техник мағлубиятга учраганимизга келадиган бўлсак, бу борада ПФЛга телефон орқали хабар берганмиз. Янгиер шаҳри ИИБга ёзма равишда мурожаат қилгандик. Айбимиз Сирдарё вилояти ИИБга хат орқали мурожаат қилганимиз бўлди. Шу боис ички ишлар ходимлари учрашувни ўтказишга қаршилик кўрсатиб, рухсат бермади. Шу тариқа ўз хатоимиз эвазига уч очкодан маҳрум бўлдик.

- Тўғрисини айтганда, бизда майдон билан боғлиқ муаммо бор. Эндиликда уй ўйинларимизни вақтинчалик Жиззах шаҳридаги “Сўғдиёна” стадионида ўтказамиз. Машғулотларни эса Зомин туманидаги кичик бир майдонда мажбур ўтказмоқдамиз. Ўзимизнинг стадион эса айни дамда таъмирланмоқда. Насиб қилса май ойининг сўнгги кунларида Зоминдаги стадионда ўйнашни бошлаймиз.


Исломбек Рустамбеков.