"Арсенал"нинг навбатдаги мураббийи - Микель Артета ҳақида мақола

Якшанба куни "Арсенал" "Манчестер Сити"га 0:3 ҳисобида ютқазди. Учрашувдан кейинги матбуот анжуманида бош мураббий Фредди Юнгберг очиқчасига шундай деди: "Менинг жамоам ва мен вазиятни тўғирлаш учун қўлимиздан келганини қилмоқдамиз. Аммо раҳбарият имкон қадар тезроқ бош мураббий бўйича қарор қабул қилиши керак".

Кечқурун ижрочи директор Винай Венкатешам ва клуб юристи Гусс Фахми "Арсенал" клубининг бош мураббийи лавозимига номзод Микель Артета билан узоқ вақт учрашув ўтказдилар. Суҳбат ярим кечага қадар давом этди, "Арсенал" вакиллари Лондон вақти билан тунда яъни соат бирда испанияликнинг уйидан чиқиб кетишган.

Воқеалар ривожи

Унаи Эмери ишдан бўшатилгандан сўнг, "Арсенал" Фредди Юнгбергни вақтинчалик бош мураббий этиб тайинлади. Маълум бўлишича, раҳбариятнинг аниқ ҳаракат режаси йўқ эди, номзодларнинг дастлабки рўйхати тузилиб, уларнинг номлари 12 кишидан иборат эди. Улар Юнгбергга вақт беришган ва шведнинг фаолияти ижобий кечса, мавсум охиригача қолдирмоқчи бўлишган.

Умидлар амалга ошмади, натижалар ўзгармади.  Кўп ўтмай, клубда топ-мураббий учун пул йўқлиги маълум бўлди. Вақт ўтиши билан турли хил номлар янгради - Нуну Санту, Патрик Виейра, Марселино. Ниҳоят Микель Артетанинг номзодига мурожаат қилинди. 

Биринчи учрашув ўтган ҳафта "Арсенал" спорт директори Рауль Санллехи билан бўлиб ўтди. Иккинчи учрашув "Сити"дан учралган 0:3 ҳисобидаги мағлубиятдан кейин Микелнинг уйида Винай ва Гусс билан бўлиб ўтган. Музокараларнинг якуний босқичи - клуб эгасининг ўғли Жош Кронке билан бўлиб ўтиши керак.

Артета шахсияти

Микель Артета - дунёга машҳур "Барселона" академияси "Ла Масия" тарбияланувчиси. Ўйинга бўлган шиддат ва замонавий футбол ёндашуви унинг қонида бор.

"У ҳам Пепга ўхшаб ўйинни жуда яхши кўради. У ақлли, деталларга жуда эҳтиёткорлик билан қарайди.  Бу ички хотиржамликни яратади ва диққат-эътиборли бўлишни таъминлайди. Микель - баркамол инсон", - дейди клуб ишчилари испаниялик ҳақида.

«Сити» жамоасининг асосий футболчиларидан бири: «Уни барча футболчилар яхши кўришади. Менимча, у жуда хушчақчақ эмас, лекин унинг ичида илиқлик ҳисси бор".

Футбол майдонидан ташқарида Микель оддий йигит. Манчестер шаҳрининг чеккасида, Дидсбери туманида яшайди. Бўш вақтларида уни Уимслоу-Роуддаги кафедан топиш мумкин.

Микель Артетанинг фигураси иккита энг катта мураббий билан боғланган. У Арсен Венгер бошчилигида ўйнашга муваффақ бўлган. Афсуски, у "Арсенал"да ўтказган вақт француз мураббийи фаолиятидаги энг муваффақиятли давр эмас эди. Бу Венгернинг футболи услубини тўлиқ ўрганишга ва клубнинг қимматбаҳо анъаналари билан танишишда унга тўсқинлик қила олмади.

Футболчилик фаолиятини тугатгандан сўнг, Микель дарҳол Пеп Гвардиоланинг "Манчестер Сити"даги мураббийлар штабига кирди. Бу 2016 йил 3 июль куни маълум бўлди.

Пеп бошчилигида Артета ёш, тажрибасиз мураббийдан ёрдамчи мураббийгача бўлган йўлни босиб ўтди. "Сити"нинг майдондаги муваффақиятининг ажралмас қисмига айланди. Ва, албатта, биз ҳар ҳафта дам олиш кунлари кузатадиган чиройли футболни яратишда иштирок этган.

Буюк мутахассислар билан ишлаган Микель уларнинг ҳар бири олдида ҳурмат қозонди.

"Аввало у жамоанинг сардори эди, шунинг учун у етакчилик хусусиятларига эга.  У ғолиб. Ҳар куни Микелни томоша қилиб, унинг футбол фаолиятини ташлаб кетмаслигига шубҳа қилмасдим. Ва мен унинг мураббийлик фолиятини яхши бажаришига ишонаман", - дейди буюк Арсен Венгер.

Микель иккита бир-бирига ўхшаш тактикани яхши билади. Испаниялик ўзига хос ўйин услубини ташкил этиши аниқ. У иккита ҳужумкор услубнинг қоришмасини яратадими ёки уларнинг бирига устунлик берадими?

Мураббийлик фалсафаси

“Менинг фалсафам оддий. Мен ҳамма 120% тайёр эканлигига ишонч ҳосил қилишим лозим, бу биринчи нарса. Агар тайёр бўлмасангиз, мени қўл остимда ўйнамайсиз. Машғулотлар пайтида биз ишлаймиз, ўйин-кулгига қарши эмасман, буни биринчи бўлиб қўллаб-қувватлайдиган инсонман. Аммо вазифаларни бажариш жуда муҳимдир. Футбол ёрқин бўлиши ва завқ бағишлаши керак.

Биз ўйинни бошқара олишимиз, ташаббусни ўзимизда ушлаб туришимиз ва томоша қилишга келган одамларни қувонтиришимиз шарт. Бунга 100% аминман ва мен буни уддалай оламан деб ўйлайман" - деганди Микель Артета 5 йил олдин футболга бўлган қарашига оид саволга берган жавобида.   

Кейинги 5 йил ичида испаниялик керакли тажрибага эга бўлиш учун кўп ишларни амалга оширди. Энди у буни ўз фолиятида татбиқ этишга тайёр.

Микель Гвардиола билан бир хил фалсафани илгари суради.  Уларнинг иккаласи ҳам "Барселона"дан чиққан, шунинг учун ўйинни шакллантиришга бўлган ёндашув ўхшаш бўлишини кутишимиз мумкин. Албатта, Пеп кўпроқ шаклланган ва ўзига мос келадиган ўйин услубига эга жамоага келганида жиддий фарқ бор. Гвардиола доимо ўзига мос ўйинчиларга муҳтожлигини таъкидлаб келади.

Артетанинг ҳолати анча мураккаб, чунки янги жамоа билан тўғри алоқани топиши, унга мослашиши керак. Ва шундан сўнг, шахсий ўзгартиришларни бирма-бир бошлаш мумкин.

Микель машғулотлар жараёнини жуда яхши тушунади ва футболчиларнинг ривожланишига таъсир қила олади.

"Манчестер Сити"да Артета жамоанинг машғулотларида Пепдан кўра кўпроқ машғулотларда қатнашади, у кўпроқ кузатувчи ролини бажаради.

Микель машғулот жараёнини бошқариш қобилиятидан ташқари, футболчиларни яхшиланишига ёрдам беради. "У кўп ўйинчиларга ёрдам берди", - дейди Габриэл Жезус.  "Агар машғулотдан кейин ўз устимда қўшимча ишламоқчи бўлсам, унга мурожаат қиламан, у келади ва биз бирга ишлаймиз. Буни клубдаги барча футболчилар билишади. У жуда ажойиб йигит”.

Фернандиньо, Жезус, Стерлинг ва Сане ривожланишларида Артетанинг қўшган ҳиссасини қайд этадилар. Сўнгги иккитасининг ривожланишида айниқса мутахассиснинг ўрни мавжуд. Уларнинг сўзларига қараганда Артета уларга нафақат ўйин бўйича ёрдам берди, балки шахс сифатида ўсишларида беминнат хизмат қилди.

Машғулот майдонидан ташқарида у тез-тез ўйинчиларни видео материалларини ўрганадиган офисига таклиф қилади.

Ўтган ой, шартномаси тугагани боис Доменек Торрент Сity Group клубларидан бири бўлган "Нью-Йорк Сити"ни тарк этди. У 11 йил (2007-2018) Пеп Гвардиоланинг ёрдамчиси эди ва у Микель Артета мураббийлар штабига киришга қарши эмаслиги ҳақида миш-мишлар тарқалмоқда.

"Арсенал", шунингдек, ёшлар билан яхши ишлайдиган Фреддини қўйиб юборишни истамайди. Клуб испаниялик штабида швед учун ҳам жой топилишига умид қилмоқда.

Микель технологиялар, спорт олимлари ва таҳлилий маълумотлар соҳасида фолият кўрсатадиган инсонлар билан ишлашни хоҳлайди.

Ўйин фалсафаси ва замонавий нуқтаи назарга эга ёш, умидли мураббий – айнан "Арсенал"га жуда зарур.

Артетани "Арсенал"да нималар кутмоқда?

Юнгбергнинг «Арсенал» бош мураббийи сифатида қисқа муддат ишлагани кейинги мураббий учун ким бўлишидан қатъий назар қийин бўлишини аниқ кўрсатиб берди.

Микель етарлича яхши бўлмаган ва "Арсенал" каби футбол брендига мос келмайдиган ўйинчиларни топади. Бу испаниялик биринчи бўлиб дуч келадиган муаммо. Албатта, биз ҳимоядаги ўйинчилар ҳақида гапиряпмиз.

"Манчестер Сити"да Артета ва Пеп майдонни муайян зоналарга бўлиш назариясига асосланган ва ўйинчиларга ҳар бир ҳудудда қандай ҳаракат қилиш кераклигини ўргатадиган ўйин услуби устида ишладилар.

Ушбу жараённи йўлга қўйиш учун вақт керак эди. Пепнинг "шаҳарликлар" бошқарувидаги биринчи мавсумини ҳамма яхши эслайди.

"Арсенал"да Микель жамоани Фредди Юнгберг сингари руҳий жиҳатдан вайрон бўлган ҳолатда қабул қилади. Бундай сценарийда клуб мавқеини дарҳол яхшилаш учун ечим топиш жуда қийин бўлади.

Микель, инглизлар айтганидек, "асал ойи"га эга бўлади. Бу қанча вақт давом этиши испанга боғлиқ. У 5 йилни "Арсенал"да ўтказди, мухлислар буни жуда яхши эслашади. Артетага бошланғич ишонч кредити берилган десак бўлади. 

Ҳозирги муносабат мухлислар тўғри йўналишдаги ўзгаришларни кўриши билан тезда табассум ва юксак қўллаб-қувватлашларга айланади.

"Арсенал" ҳар доим ўз мураббийларидан сифатли футболни талаб қилади. Шунингдек, мухлислар омилини ҳисобга олиш керак. Жамоадан кутиладиган умидлар ўзгармай қолади - ТОП-4, Чемпионлар Лигаси, чемпионлик пойгасида кураш.

"Арсенал"да ўйнаш учун сизга катта елкалар керак", - дейди Тьерри Анри, ҳар қачонгидан жиддийроқ.

Қишки трансферлар ойнасидаги фаоллик - муқаррар шартдир. Гвардиола ўз футболини ўйнай оладиган ўйинчиларни сотиб олиш учун 200 миллион евро сарфлаган.

Унинг ҳозирги ёрдамчиси узоқ муддатли асосга айланадиган мустаҳкам пойдевор ва ҳамжиҳат жамоа тузиш учун барча имкониятларга эга.

Мақоламиз сўнггида Арсенал" мухлислари Микель Артетадан кўп нарсани кутаётганликларини эслатиб ўтамиз ҳамда бош мураббийлик йўлида унга улкан сабр тилаймиз. Омад, El Artista!

Шерзод Нурматов тайёрлади.