"Арсенал" ва МЮ скаутларини "Бетис" футболчисини кузатиш учун юборди

Бразилиялик ёш форвард "Бетис"да порлаганидан кейин АПЛнинг "Манчестер Юнайтед" ва "Арсенал" клублари скаутлари учун бош мақсадга айланди. 22 ёшли футболчи Испанияда кейинги ҳафталарда "Атлетик" ва "Барселона"га қарши ўйинларда ўзини кўрсатди, "Райо Вальекано" билан баҳсда ғалаба голини урди ва жамоасининг турнир жадвалида олтинчи поғонада бўлишига ёрдамлашди. 

Испаниянинг "Al Final de la Palmera" нашрининг маълум қилишича, Энрике "қизил иблислар" ва "тўпчилар" ўртасида савдо уришига сабаб бўлиши мумкин. Бироқ ушбу келишувнинг январь ойида амалга ошиши даргумон. Жанубий америкалик ҳужумчи Европанинг юқори лигаларидан бирида кўриниш берганидан сўнг бир неча бор инглиз скаутларни ўзига жалб қилган.

"Бетис" Луис Энрикени маҳаллий "Флуминенсе"дан атиги 7,1 млн фунтга сотиб олди ва футболчи Европага кўчиб ўтди. Испан клуби унинг ортидан катта фойда кўриши мумкин. 

Бразилиянинг 20 ёшгача бўлган терма жамоаси футболчиси шу пайтгача 22 та ўйинда майдонга тушиб, 3 та гол ва 5 та голли узатмани ҳисобига ёздирди. Ана шу ассистларнинг иккитаси январь ойи бошида "Барселона" билан ўйинда қайд этилди. Ўша ўйинда гарчи жамоаси якунда мағлуб бўлган бўлса-да, Луис Энрике майдондаги энг яхши ўйинчилардан бири бўлди ва унинг 101-дақиқадаги голли узатмаси ҳисобни тенглаштиришга хизмат қилди. 

Ёш ҳужумчининг "Бенито Вильямарин" эгалари билан амалдаги шартномаси 2028 йилга қадар мўлжалланган. У ҳозирги клубини кутилганидан анча эрта тарк этиши мумкин, чунки "Арсенал" трансфер бозорига форвард излаб кирган. "Тўпчилар" украиналик Михаил Мудрикни "Челси"га бой берди. Улар анчадан буён таъқиб қилаётган Рафинья ҳам "Барселона"да қолишни афзал кўраётган кўринади.