Анвар Бердиев ўтган мавсумдаги тўпурар ҳужумчиси нима сабабдан "Шўртан"дан кетганини айтди

- "Навбаҳор"ни ғалаба билан табриклайман. Бундай мухлислар олдида ўйнаш ҳар бир футболчи учун шараф бўлиши керак. Биринчи бўлим охирида стандартдан кейин гол қўйиб юбордик. Иккинчи бўлимда вазиятни ўнглаш учун олдинга ҳаракатландик ва шу сабабли иккинчи голни ўтказиб юбордик. Бизда ҳам вазиятлар бўлди. Агарда бундай ўйинларда вазиятлардан фойдалана олмасак, очко олишимиз жуда қийин бўлади. Наманганда шунча мухлис қаршисида "Навбаҳор" майдонида вазиятлардан фойдалана олмасангиз босим кўтарилиб кетаверади.

- Анвар ака, Сизни жуда кучли ҳужумчи сифатида кўрганмиз. Бугун "Шўртан"да яққол ҳужумчини кўра олмадик. Бунга сабаб нимада?

- Эътибор берган бўлсангиз, биз бугун уч нафар ҳужумчи билан ўйнадик. Ҳужумга қанотдагилар ҳам ёрдам беришлари керак эди. Ҳужумга ўта олмасак ҳимояланишимиз керак. Ҳужум чизиғимизда Далер Шарипов ҳаракат қилди. Биринчи бўлимда бизда кўп ҳам вазият бўлмагани учун ҳужумчимиз кўринмади. Иккинчи бўлимда эса бизда дарвозани ишғол қилиш учун вазиятлар бўлди, бироқ бундан фойдалана олмадик. Айта оламанки, бугун биз уч нафар ҳужумчи билан ҳаракатландик.

- Таркибингиздаги футболчиларнинг катта қисми, ва шунингдек, балки Сизнинг мураббийлик фаолиятингизда ҳам бугунгидек мухлислар тўла, қайноқ атмосферадаги стадионда биринчи ўйинингиз бўлса керак. Ҳиссиётлар қандай?

- Шундай. Олдин биз Наманганга футболчи сифатида келганмиз. Бу сафар мураббий сифатида келдим, ҳиссиётлар ўша-ўша. Наманганда футбол ўйнаш ёқимли. Негаки тўла стадионда футбол ўйнаш футболчи учун шараф бўлиши, стадионнинг ҳар бир қаричида тўп учун курашиши лозим. Футболчиларда бир кун келиб нимадир ўзгариши керак-ки, биз сўнгги вазиятда нуқта қўя оладиган жойда оқсаяпмиз. Футболчилар ҳаракат қилишмоқда, буни машғулотларда ҳам ишлаяпмиз. Бугун ҳам кўрдингиз, вазиятлар бўлди, булардан гол ура олмадик. Наманганда "Навбаҳор"га қарши тўп суриш барча учун қийин бўлади. Хатолар устида ишлаймиз, "Навбаҳор"га кейинги ўйинларда омад тилаймиз.

- Яқин ўтмишнинг энг яхши ҳужумчиларидан бирисиз. Футболчилик фаолиятингизга назар солсак, ўша пайтларда бир йўла бир неча нафар ўзбекистонлик ҳужумчилар тўпурарлик учун курашарди. Хатто жамоалар етакчилари ҳужумчилар бўлишарди. 25тадан кам гол урган футболчи тўпурар бўла олмасди, хатто 25-28та гол урган футболчи иккинчи, учинчи ўринда қайд этиларди. Сиз билан ўйнаган Умид Исоқов, Бахтиёр Ҳамидуллаев, Шуҳрат Мирхолдиршоев каби ҳужумчилар бор эди. Ҳозир эса бизда ҳужумчилар камайиб кетди. Яхши ҳужумчиларнинг чиқмаётгани сабаби нимада деб ўйлайсиз?

- Фикримча, ҳозирги эътибор жамоавий футболга ўтиб кетди. Яққол ҳужумчиларга эркинлик берилмай қўйди. Бизда яхши иқтидорлар кўп. Уларни яхши тарбияласак янги Умид Исоқов, Бахтиёр Ҳамидуллаев, Шуҳрат Мирхолдиршоевлар етишиб чиқади. Бу устида ишлаш керак. Футболчига эркинлик бериш керак. Яқин келажакда ўша каби ҳужумчилар етишиб чиқади. Менга ҳам бу ачинарли ҳолат. Сўнгги йилларда легионерлар тўпурарликка баҳслашяпти. Бу бизнинг футболчиларга иштиёқ бўлиши керак. Агарда бизда маҳаллий футболчиларга эътибор қаратилса, ўзбеклар ҳам тўпурарлик учун кураша олади. 

- Ўз жамоангиздаги бирор ҳужумчи билан бу борада ишлаяпсизми?

- Албатта. Ҳужумчиларимизга эътибор берадиган бўлсангиз, бири Далер Шарипов 2004 йил, ҳали жуда ёш. Иккинчисини Қирғизистон чемпионатидан чақириб олдик. Биз имкон даражасида ўз футболчиларимиздан жамоа шакллантирдик. Бироқ ҳали ҳам футболчиларда ўзига бўлган ишончсизликни йўқота олмаяпмиз. Машғулотларда яхши ҳаракат қиляпмиз, ҳаммаси яхши ўхшаяпти. Майдонда ҳам ўйин борасида ёмон эмасмиз. Ишлашда давом этсак бу камчиликларни йўқота оламиз.

- Ўтган йили жамоада тўпурар ҳужумчи (Мухриддин Зоиров) бор эди. У нега жамоадан кетди?

- У билан молиявий шартларни келиша олмадик. Бошқа клуб биз таклиф қилган суммадан кўпроқ кўпроқ бергани учун жамоамиздан кетди. Оддий жавоб шу.

- Қаршидан Суперлигада уч жамоа бор. "Шўртан"нинг молиявий ҳолати қандай?

- Менимча бюджет каби маълумотларни ошкор қилишим нотўғри бўлади. Бизга ҳомийимиз "Ҳудудгаз" катта ёрдам бермоқда. Уларга алоҳида миннатдорлик билдираман. Бор имкониятимиздан келиб чиқиб ҳаракат қилишда давом этамиз.

- "Шўртан"нинг олдидаги мақсади қандай?

- Жамоамиз ҳар бир ўйинда ғалаба учун ўйнаймиз. Лекин бунинг учун футболчилар ўзларига бўлган ишончини ошириши керак. Бу устида ишлаяпмиз. Кейинчалик натижа ҳам бўлади.