Анвар Бердиев: “Футболчиларимиз бугун қандайдир ишончсиз ҳаракат қилишди”

Ўйин ҳақида

- “Машъал” жамоасини ғалаба билан табриклайман. Футболчиларимиз бугунги учрашувда қандайдир ишончсиз ҳаракат қилишди. Буни кўриб чиқиб, таҳлил қиламиз.

- Ғузордаги ўйинда жамоанингиз “камбэк” эвазига “Машъал”ни мағлуб этганди. Ўша ва ҳозирги “Шўртан” ўртасида қандай фарқ бор?

- Фарқ йўқ албатта. Лекин ўйинда фарқ бўлади. Футболчиларнинг ўйинга тайёргарлиги ва иштиёқи кўп нарсани ҳал қилади. Бизда бугун иштиёқ етишмагандек кўринди.

- Воҳа дербиси каби марказий ўйинларда легионерларга эҳтиёж сезасизми?

- Тўғриси, маҳаллий футболчиларга ишонч билдираман. Легионерлар билан ишлаш ҳоҳлайсизми, йўқми қийин. Маҳаллий футболчиларга кўпроқ имкон берсак, бу футболимиз учун фойдали бўлади.

- Қийинчилик моддий жиҳатданми ёки тил билан боғлиқ муаммо туфайлими?

- Тил масаласи ҳам бор. Футболчилик вақтимда кўрганман, легионер футболчилар камдан-кам ҳолатда жамоа учун жон куйдириб ўйнайди. Асосан маҳаллий футболчиларга имкон беришга шу боисдан ҳам ҳаракат қиламан.

- “Шўртан” Про-лигада гол ўтказиб юбориш бўйича 3-ўринда экан. Давралар оралиғида ҳимояни мустаҳкамлаш бўйича қандай ишлар олиб бордингиз?

- Давралар оралиғида ҳимоя чизиғи бўйича ишладик. Футболчи майдонга чиққанида ҳушёрликни йўқотмаслиги лозим. Ҳакам ҳуштаги чалиниб бошлангандан то тугагунича ҳушёрлик талаб этилади, ёки рақиб сизни жазолайди.

- Бугун Про-лигада VAR тизими ишлаганига гувоҳ бўлдик. Бу ҳақида фикрингиз қандай?

- Албатта, VAR тизими бўлгани яхши. Футболчилар майдонда эҳтиёткор ҳаракат қилишади. Суперлигада кўраяпмиз, ҳар бир футболчи ўз ҳаракатларини назорат остига олаяпти. VAR тизими бўлса, бу яхши.

- Бугунги натижадан сўнг “Машъал” жамоангиздан 7 очкога илгарилаб кетди. Нима деб ўйлайсиз, биринчи ва иккинчи ўринлар учун кураш давом этадими?

- Албатта, кураш мавсум охирига қадар давом этади. Про-лигада ўткинчи ўйинлар бўлмайди. Ҳар бир очко учун кураш жиддий кечаяпти.