Аньелли ва Чеферин миш-мишлар сабаб қўшма баёнот тайёрлаган. Аммо "Юве" раҳбари ўша пайт телефонини ўчириб қўйган экан

Улар Европа чемпионлар лигасидаги ислоҳотлар ҳақида 19 апрель куни эълон қилмоқчи бўлганлар.

Суперлига тузиш ҳақида маълумотлар пайдо бўла бошлагач, Чеферин ўзи яшайдиган Словениядан тезда УЕФА штаб-квартирасига йўл олади. У Аньеллига ҳам қўнғироқ қилади, аммо "Юве" раҳбари қўнғироққа жавоб бермайди. 

Аньеллининг қизларидан бирига чўқинтирган ота ҳисобланадиган Чеферин шундан сўнг Андреанинг турмуш ўртоғига қўнғироқ қилади ва эри ўзига қайтиб қўнғироқ қилиши зарурлигини айтиб, илтимос қилади. УЕФА раҳбари йўлда бўлган пайт Аньелли Чеферинга қўнғироқ қилади ва барчаси жойида эканлигини таъкидлайди. 

Чеферин бунга ишончи комил бўлмаган ва биргаликда қўшма баёнот беришларини истаган. Словениялик функционер Аньеллига баёнот матнини юборади. Бир неча қўнғироғидан сўнг Аньелли унга бироз вақт кераклигини айтади ва телефонини ўчириб қўяди. Шундан кўп ўтмай, Суперлига тузилгани ва унда "Ювентус" лига асосчиларидан бири эканлиги эълон қилинади.