Андрей Фёдоров: "Ал Ваҳда" гуруҳда биринчи ўринда, демак уларнинг кучсиз томони йўқ"

"Аввало барчани Рамазон ойи бошлангани билан табриклайман. Ўйинга келсак, биз ҳам, рақибимиз ҳам эртанги баҳсдаги натижа қанчалик муҳим эканлигини тушуниб турибди. Афсуски ОЧЛдаги сўнгги турлардаги натижаларимиз ижобий чиқмади. Шу боис қолган иккала баҳсда ҳам ғалаба қозонишимиз шарт. Биз гуруҳдан чиқиш учун бор кучимизни ишга соламиз.

Эртага бизни фақат 3 очко қизиқтиради. Шу боис ўзимизнинг ўйинимизга эътибор қаратамиз. "Ал Ваҳда" қандай ўйнашининг фарқи йўқ. Ўтган мавсумда ҳам бу клуб билан бир гуруҳда бўлганмиз, бир-биримизни яхши биламиз. Барчаси майдонда ҳал бўлади. Ким эртага кўпроқ тайёр бўлса ўша жамоа ғолиб бўлади.

Агар гуруҳда биринчи ўринда бораётган бўлса, менимча "Ал Ваҳда"нинг кучсиз томонлари йўқ. Аммо эртага рақибнинг камчиликларини топишга уринамиз", - дейди Андрей Фёдоров.

"Ассалому алайкум. Рамазон муборак бўлсин. Бор эътиборимиз кейинги баҳсга қаратилган. Мақсадимиз фақат ва фақат 3 очко олиш. Тўғри қийин бўлади, аммо ортга йўл йўқ. Таркибимизда ҳеч кимда жароҳат йўқ, фақатгина бир ҳимоячимиз иккита сариқ карточка олгани боис майдонга туша олмайди холос. Барча футболчилар "Ал Ваҳда"га қарши ўйин оғир ўтишини тушуниб туришибди", - дейди Азизбек Ҳайдаров.