Андреа Пирлонинг ўғли ноқонуний пул тикиш можароси марказида

Николо Пирло 2022 йил, эндигина 17 ёшга тўлганида ноқонуний онлайн-схемада қатнашиб, 30 000 евро қарздор бўлган. Пирло қонуний васий сифатида муаммони тўхтатиш учун ўғлининг банк ҳисобини у вояга етгунча блоклаб қўйган.

Бу ҳақда "Corriere della Sera" томонидан олиб борилган суриштирув натижаларида маълум бўлди. "Фиорентина" ярим ҳимоячиси Николо Фажоли ёзишмаларда Пирлонинг ўғлини "сафдошларимиздан бири" деб атаган ва схема асосчиси, бош ҳакам Пьетро Маринонига отаси унинг пул олишига тўсқинлик қилганини айтган.

D Серия ҳаками Маринони ёш футболчиларни пул тикишга жалб қилганликда гумон қилинмоқда. Прокурорлар ушбу ишга алоқадор 12 футболчи устидан тергов бошлаганидан сўнг уни футболдан четлаштирган эди.

Олдинроқ "Ньюкасл" ярим ҳимоячиси Сандро Тонали Маринони уни қимор ўйинларига жалб қилганини тан олганди. Унга кўра, унинг 500 минг евро қарзи бор эди, аммо ҳеч қандай таҳдидлар бўлмаган – унга шунчаки ўйнашни давом эттириш таклиф қилинган.