Алишер Никимбаев: "Эрматов масъулияти ва қийинчиликларини тасаввур қиляпман"

"Равшан Эрматов ва Звонимир Бобан. Жаҳонга машҳур ҳакам ва футболчи. Кеча уларнинг ҳаётида катта ўзгариш юз берди. Уларни фақатгина ўзгариш рўй берган вақт бирлаштирмайди. Бобан ФИФА бош котиби ўринбосари лавозимини тарк этди ва "Милан"нинг бош директорига айланди.

Эрматов эса кеча Ўзбекистон футбол ассоциациясининг вақтинчалик вице-президенти этиб сайланди.

Уларнинг иккиси ҳам минглаб инсонлар орзу қиладиган ишдан воз кечишди. Бобан ўзи футбол юлдузига айланган клубга қайтди. Эрматов миллий футболимизни ривожлантириш масъулиятини ўз бўйнига олди.

Бобан дунё футбол ташкилотининг учинчи даражали раҳбарларидан бири эди. Аммо севимли клубига қайтиш учун бу мансабдан воз кечди. Эрматов ўзининг тўртинчи жаҳон чемпионатига - жаҳон футболи тарихидаги рекордига интилаётган эди, бироқ янги иши учун у ҳакамлик фаолиятини муддатидан аввал якунлайдиган бўлди.

Мен "Милан" мухлиси эмасман, шу сабабли Бобан қандай қийинчиликларни бошдан кечиришини билмайман. Аммо Эрматов янги вазифасининг масъулияти ва қийинчиликларини тасаввур қиляпман.

Икки йил аввал ўзбек футболи катта таъмирлашга муҳтож эди, бугун уни қайтадан бошлашга тўғри келади. Вазифа қийин, бироқ уддалса бўлади. Асосийси, Эрматов олдида турган вазифаларни жуда яхши тушунади. У айнан нимани алмаштириш кераклигини билади. Шу билан бирга, у миллий футболимиз равнақи йўлида ишлашга тайёр ва қодир бўлган мутахассислар етарлича эканидан хабардор. Яна бир муҳим нарса: Эрматовда Ўзбекистон футбол жамоатчилиги ишончи бор, бу унга янги ишда ёрдам бериши керак" - деб ёзади Никимбаев.