Александр Хомяков: "Бир нечта позицияни кучайтирамиз"

Баҳсда андижонликлар кичик ҳисобда ғалаба қозонишди. Учрашувдан сўнг "Андижон" устози Александр Хомяковни суҳбатга тортдик.

- Яна "Андижон"дасиз. Ўзингизни қандай ҳис этяпсиз?

- Яна иш жойимга қайтдим. Жамоада ўзгаришларга қўл уриляпти. Икки сўз билан айтганда, бахтлиман. 

- "Андижон"га қайтганингизда қандайдир ўзгаришни сездингизми?

- Асосий вазифамиз жамоа ўзагини сақлаб қолиш эди. Янги мавсумда Суперлигада ўйнаймиз. Бир нечта позицияни кучайтирамиз. Тез орада янги номларни билиб оласиз. 

- "Андижон"нинг янги мавсум учун мақсади?

- Ҳозирча режаларни раҳбарият билан муҳокама қилмадик. Қайси ҳудудда эканлигимиз ва қандай мухлисларимиз борлигини биласиз. Уларни натижа билан хурсанд қилишга уринамиз.

- Жамоа Про лигада чемпион бўлди, мухлислар кўп нарсани кутади...

- Буни яхши тушуниб турибмиз. Масъулиятни ҳис қилиб турибмиз. Режа бўйича иш юритамиз.

- Янги футболчилар ҳақида нима дея оласиз?

- Тез орада айрим позицияларни кучайтирамиз. Умуман олганда, жамоа ўзагини сақлаб қолиш ниятимиз бор. 

- "Андижон"нинг бошқа жамоалар билан трансферларини солиштирсак, ҳолат қанақа?

- Раҳбарият ва мураббийлар алмашди. Секин-аста ҳаммаси жой жойига тушади. 

- Бугунги баҳс борасида нима дейсиз?

- Аномал совуқ бўлганига қарамасдан, курашларга бой баҳс бўлди. Майдон ўйин ўтказиш учун жуда яхши ҳолатда эди. Бу учун "Чиғатой" майдони ходимларига раҳмат. Шаҳарда 2-3 та стадион қордан тозаланган, шунинг учун уларни эътироф этиш керак. Баҳсда жароҳатлар бўлмади, бу эса хурсанд қилди.

- "Андижон" Туркиянинг Анталия шаҳрида йиғин ўтказади. Легионерлар келиб қўшиладими?

- Сиз ҳаммасини биласиз (кулади). Ҳа, бир нечта легионерларни жалб қиламиз.